പള്ളിവാസല് ഗ്രാമപഞ്ചായത്തിന്റെ നേതൃത്വത്തില് പണികഴിപ്പിച്ച ഷീ ലോഡ്ജിന്റെ ഉദ്ഘാടനം നടന്നു
അടിമാലി: പള്ളിവാസല് ഗ്രാമപഞ്ചായത്തിന്റെ നേതൃത്വത്തില് പണികഴിപ്പിച്ച ഷീ ലോഡ്ജിന്റെ ഉദ്ഘാടനം നടന്നു.ബഹുവര്ഷ പദ്ധതിയായി തുക വകയിരുത്തിയാണ് പഞ്ചായത്ത് പദ്ധതി നടപ്പിലാക്കിയിട്ടുള്ളത്. മൂന്നാറിലേക്കെത്തുന്ന വനിതകളായ വിനോദ സഞ്ചാരികള്ക്ക് സുരക്ഷിത താമസത്തിന് അവസരമൊരുക്കാന് ലക്ഷ്യമിട്ടാണ് പള്ളിവാസല് ഗ്രാമപഞ്ചായത്ത് ഷീ ലോഡ്ജ് നിര്മ്മിച്ചിട്ടുള്ളത്.
ഡോര്മെറ്ററിയും ഏഴ് മുറികളുമായി രണ്ടാംമൈലിലാണ് ഷീ ലോഡ്ജ് പ്രവര്ത്തിക്കുന്നത്. വനിതകള്ക്ക് സുരക്ഷിത താമസത്തിന് അവസരമൊരുക്കുകയെന്നതിനൊപ്പം തദ്ദേശിയരായ വനിതകള്ക്ക് തൊഴില് അവസരം സൃഷ്ടിക്കുകയെന്ന ലക്ഷ്യവും കൂടി പദ്ധതിക്കുണ്ട്. ഒരു ഗ്രാമപഞ്ചായത്ത് സ്വതന്ത്രമായി നിര്മ്മിച്ച സംസ്ഥാനത്തെ ആദ്യത്തെ ഷീ ലോഡ്ജ് കൂടിയാണ് രണ്ടാംമൈലിലേത്. നിര്മ്മാണം പൂര്ത്തീകരിച്ച ഷീ ലോഡ്ജിന്റെ ഉദ്ഘാടനം അഡ്വ. എ രാജ എം എല് എ നിര്വ്വഹിച്ചു.
ഷീ ലോഡ്ജ് പദ്ധതി മൂന്നാറിന്റെ വിനോദസഞ്ചാരമേഖലക്ക് കൂടുതല് കരുത്ത് പകരുമെന്നാണ് പ്രതീക്ഷ. 2022- 23 വര്ഷത്തിലായിരുന്നു പള്ളിവാസല് പഞ്ചായത്ത് പദ്ധതിക്ക് തുടക്കം കുറിച്ചത്. ഡോര്മെറ്ററിയില് മാത്രം മുപ്പതിലധികം ആളുകള്ക്ക് താമസ സൗകര്യമൊരുക്കും. ഉദ്ഘാടന ചടങ്ങില് പള്ളിവാസല് ഗ്രാമപഞ്ചായത്ത് പ്രസിഡന്റ് വി ജി പ്രതീഷ് കുമാര് അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്റ് എം ലത, മറ്റ് പഞ്ചായത്തംഗങ്ങള്, ഉദ്യോഗസ്ഥ പ്രതിനിധികള്, വിവിധ രാഷ്ട്രീയ പാര്ട്ടി പ്രതിനിധികള് തുടങ്ങിയവര് സംബന്ധിച്ചു.
