കുട്ടികളിലെ ആസ്ത്മ ; ഒഴിവാക്കേണ്ടതും നൽകേണ്ടതുമായ ഭക്ഷണങ്ങൾ

കുട്ടികളിൽ പ്രധാനമായി കണ്ട് വരുന്ന ആരോ​ഗ്യ പ്രശ്നമാണ് ആസ്ത്മ. ശ്വാസനാളത്തിലുണ്ടാകുന്ന ഒരു വിട്ടുമാറാത്ത അവസ്ഥയാണിത്. ശ്വാസനാളത്തിന്റെ പേശികൾ മുറുകുന്നതിലേക്ക് നയിക്കുന്ന ശ്വാസനാളത്തിന്റെ വീക്കം, ശ്വാസനാളത്തിന്റെ ഭിത്തികൾ കട്ടിയാകുകയും അതുവഴി ശ്വാസനാളങ്ങൾ ഇടുങ്ങിയതാക്കുകയും ശ്വാസതടസം ഉണ്ടാകുകയും ചെയ്യുന്നതാണ് ഈ അവസ്ഥ. ഇത് ദൈനംദിന പ്രവർത്തനങ്ങളെ തടസ്സപ്പെടുത്തുകയും കുട്ടികളുടെ ജീവിത നിലവാരം കുറയ്ക്കുകയും ചെയ്യും.

കുട്ടികളിൽ ആസ്ത്മ നിയന്ത്രിക്കുന്നതിൽ ഭക്ഷണക്രമം നിർണായക പങ്ക് വഹിക്കുന്നു. ഇന്ത്യയിലെ 6-10 ശതമാനം കുട്ടികളെയും ആസ്ത്മ ബാധിക്കുന്നു. ഇത് ശ്വസിക്കാൻ ബുദ്ധിമുട്ട്, ഇടയ്ക്കിടെയുള്ള ചുമ തുടങ്ങിയ ലക്ഷണങ്ങൾക്ക് കാരണമാകുന്നു. ശരിയായ ഭക്ഷണക്രമം രോഗവ്യാപനം കുറയ്ക്കാൻ സഹായിക്കും. 

ഇന്ത്യയിൽ വർദ്ധിച്ചുവരുന്ന ആസ്ത്മ നിരക്കുകൾ ജീവിതശൈലിയിലെ മാറ്റങ്ങൾ, കൂടുതൽ സംസ്കരിച്ച ഭക്ഷണങ്ങൾ, പഞ്ചസാര അടങ്ങിയ ലഘുഭക്ഷണങ്ങൾ, ഫാസ്റ്റ് ഫുഡ് എന്നിവയുമായി ബന്ധപ്പെട്ടിരിക്കുന്നു. നഗരവൽക്കരണവും പരിസ്ഥിതി മലിനീകരണവും, വായു മലിനീകരണം, പുകയില പുക, മോശം ജീവിത സാഹചര്യങ്ങൾ, അലർജികൾ, രാസവസ്തുക്കൾ എന്നിവയുമായി സമ്പർക്കം പുലർത്തൽ തുടങ്ങിയ പ്രധാന പാരിസ്ഥിതിക ഘടകങ്ങൾ ആസ്ത്മയുടെ സാധ്യതയും തീവ്രതയും വർദ്ധിപ്പിക്കുന്നു. 

ഭക്ഷണത്തിൽ ശ്രദ്ധിക്കേണ്ടത്…

പഴങ്ങൾ, പച്ചക്കറികൾ, ധാന്യങ്ങൾ, ആരോഗ്യകരമായ കൊഴുപ്പുകൾ എന്നിവയാൽ സമ്പന്നമായ ഒരു സമീകൃതാഹാരം കുട്ടികളിലും മുതിർന്നവരിലും ആസ്തമയുടെ ലക്ഷണങ്ങളെ കുറയ്ക്കും. സംസ്കരിച്ചതും ഉയർന്ന പഞ്ചസാരയും ഉള്ള ഭക്ഷണങ്ങൾ പരിമിതപ്പെടുത്തുന്നത്   ശ്വാസകോശ ആരോഗ്യം നിലനിർത്താനും സഹായിക്കും.

ആസ്ത്മയുള്ള കുട്ടികൾക്ക്, മെഡിറ്ററേനിയൻ ഭക്ഷണക്രമവും സസ്യാധിഷ്ഠിത ഭക്ഷണക്രമവും ലക്ഷണങ്ങൾ കുറയ്ക്കുന്നതിനും ആസ്ത്മ നിയന്ത്രണം മെച്ചപ്പെടുത്തുന്നതിനും കാരണമാകുന്നു. പഴങ്ങൾ, പച്ചക്കറികൾ, ധാന്യങ്ങൾ, ആരോഗ്യകരമായ കൊഴുപ്പുകൾ എന്നിവയാൽ സമ്പന്നമായ മെഡിറ്ററേനിയൻ ഭക്ഷണക്രമം ശ്വാസതടസ്സവും വീക്കവും കുറയ്ക്കുമെന്ന് പഠനങ്ങൾ പറയുന്നു. 

നാരുകൾ കൂടുതലുള്ളതും പൂരിത കൊഴുപ്പ് കുറഞ്ഞതുമായ സസ്യാഹാരങ്ങൾ വീക്കം കുറയ്ക്കാൻ സഹായിക്കുകയും ആസ്ത്മ ലക്ഷണങ്ങൾ കുറയ്ക്കാനും സഹായിക്കും. 

ആപ്പിൾ, കിവി, വാഴപ്പഴം, ഓറഞ്ച്, മാതളനാരങ്ങ, ചീര, പടവലം എന്നിവ വിറ്റാമിനുകളും ആന്റിഓക്‌സിഡന്റുകളും കൊണ്ട് സമ്പുഷ്ടമാണ്. ഇത് ശ്വാസനാളത്തിലെ വീക്കം കുറയ്ക്കുകയും ശ്വാസകോശാരോഗ്യത്തെ പിന്തുണയ്ക്കുകയും ചെയ്യുന്നു. ഓട്സ്, തിന എന്നിവ രോഗപ്രതിരോധ പ്രവർത്തനത്തെ പിന്തുണയ്ക്കുകയും വീക്കം കുറയ്ക്കുകയും ചെയ്യുന്നു.