അടിമാലി: ഒന്നാംഘട്ട വോട്ടെടുപ്പിന്റെ ഭാഗമായി അടിമാലി, മൂന്നാര് മേഖലകളിലും പോളിംഗ് സാമഗ്രികളുടെ വിതരണം നടന്നു. വിദൂര ആദിവാസി ഇടങ്ങളായ ഇടമലക്കുടിയിലേക്കും കുറത്തിക്കുടിയിലേക്കും പോളിംഗ് സാമഗ്രികള് എത്തിച്ചു. എത്തിച്ചേരുന്നതില് ദൂരക്കൂടുതലുള്ള ഇടങ്ങളിലേക്കുള്ള പോളിംഗ് സാമഗ്രികളുടെ വിതരണമാണ് ആദ്യം പൂര്ത്തീകരിച്ചത്.
അടിമാലി ബ്ലോക്ക് പഞ്ചായത്ത് പരിധിയില് വരുന്ന വിവിധ പഞ്ചായത്തുകള്ക്കുള്ള പോളിംഗ് സാമഗ്രികളുടെ വിതരണം അടിമാലി സര്ക്കാര് ഹൈസ്ക്കൂളിലായിരുന്നു ഒരുക്കിയിരുന്നത്. ദേവികുളം ബ്ലോക്ക് പഞ്ചായത്ത് പരിധിയില് വരുന്ന വിവിധ പഞ്ചായത്തുകള്ക്കുള്ള പോളിംഗ് സാമഗ്രികളുടെ വിതരണം മൂന്നാര് വൊക്കേഷണല് ഹയര്സെക്കണ്ടറി സ്കൂളിലായിരുന്നു ക്രമീകരിച്ചിരുന്നത്. കുറ്റമറ്റ രീതിയില് പോളിംഗ് സാമഗ്രികളുടെ വിതരണം പൂര്ത്തീകരിക്കാന് വേണ്ടുന്ന ഒരുക്കങ്ങള് നടത്തിയിരുന്നു.
പോളിംഗ് സാമഗ്രികളുടെ വിതരണം നടന്ന കേന്ദ്രങ്ങളില് തന്നെയാണ് വോട്ടെണ്ണലും ക്രമീകരിച്ചിട്ടുള്ളത്. പോളിംഗിനായി സംസ്ഥാനത്താകെ 1.8 ലക്ഷം ഉദ്യോഗസ്ഥരേയും 70000 പോലീസ് ഉദ്യോഗസ്ഥരേയും നിയോഗിച്ചിട്ടുണ്ട്. എല്ലാ പോളിംഗ് സ്റ്റേഷനുകളിലും പോലീസ് സുരക്ഷയും പ്രശ്ന ബാധിത ബൂത്തുകളില് പ്രത്യേക പോലീസ് സുരക്ഷയും വെബ്കാസ്റ്റിംങ്ങും വീഡിയോ ചിത്രീകരണവും ഏര്പ്പെടുത്തിയിട്ടുണ്ട്.നാളത്തെ വോട്ടെടുപ്പിന് ശേഷം പോളിംഗ് ഉദ്യോഗസ്ഥര് വോട്ടിംഗ് മെഷ്യനുകളുമായി വിതരണ കേന്ദ്രങ്ങളില് തിരികെയെത്തും.
