മൂന്നാറിലും പരിസര പ്രദേശങ്ങളിലും ഗതാഗതകുരുക്ക് രൂക്ഷം; നട്ടം തിരിഞ്ഞ് സഞ്ചാരികളും തദ്ദേശിയരും
മൂന്നാര്: ക്രിസ്തുമസ് പുതുവത്സരാഘോഷങ്ങള്ക്കായി മൂന്നാറിലേക്ക് സഞ്ചാരികള് ഒഴുകുകയാണ്. മൂന്നാറിലെ അതിശൈത്യവും തിരക്ക് വര്ധിക്കാന് ഇടയാക്കിയിട്ടുണ്ട്. എന്നാല് സഞ്ചാരികളുടെ വരവ് വര്ധിച്ചതോടെ പതിവുപോലെ മൂന്നാറിലും പരിസര പ്രദേശങ്ങളിലും ഗതാഗതകുരുക്കും രൂക്ഷമായി. ഏറെ സമയം സഞ്ചാരികള് വാഹനങ്ങളില് റോഡില് കുരുങ്ങുന്ന സ്ഥിതിയുണ്ട്.ഇക്കാരണം കൊണ്ടു തന്നെ ഉദ്ദേശിക്കുന്ന സമയത്ത് ലക്ഷ്യ സ്ഥാനത്തെത്താന് സഞ്ചാരികള്ക്ക് കഴിയാതെ വരുന്നു.
സഞ്ചാരികള്ക്കൊപ്പം തദ്ദേശിയരും പ്രതിസന്ധി നേരിടുന്നുണ്ട്. വിനോദ സഞ്ചാരികള് ശുചിമുറികളില് പോകാനാവാതെ ഭക്ഷണവും വെള്ളവും ഇല്ലാതെ ഏറെ സമയം വാഹനങ്ങളില് ഇരിക്കേണ്ടുന്ന സാഹചര്യം പ്രതിസന്ധിയാകുന്നുണ്ട്.അതേ സമയം കുരുക്ക് കുറക്കാന് നടപടി സ്വീകരിച്ചിട്ടുള്ളതായി പോലീസ് അറിയിച്ചു.
അതേ സമയം തിരക്കേറുമ്പോഴെല്ലാം മൂന്നാറില് സമാന സ്ഥിതി ആവര്ത്തിക്കുന്നതില് പ്രതിഷേധം ശക്തമാണ്.
മൂന്നാര് ടൗണ്, ആനച്ചാല് ടൗണ്, മൂന്നാര് മാട്ടുപ്പെട്ടി റോഡ്, മൂന്നാര് മറയൂര് റോഡ് എല്ലായിടത്തും സ്ഥിതി സമാനം തന്നെ.റോഡുകളുടെ വീതികുറവാണ് ഗതാഗതകുരുക്കിനുള്ള പ്രധാന കാരണം. ചിലയിടങ്ങളിലെ വഴിയോര കച്ചവടവും തോന്നും പടിയുള്ള പാര്ക്കിംഗും പ്രതിസന്ധിയാണ്. മൂന്നാര് മേഖലയില് ഏറ്റവും വേഗത്തില് റോഡ് വികസനം സാധ്യമാക്കിയില്ലെങ്കില് മൂന്നാറിന്റെ ടൂറിസം താളം തെറ്റും.
