അടിമാലി: അടിമാലി ടൗണിലൂടെ കടന്നു പോകുന്ന ദേശിയപാതകളില് സീബ്രാ ലൈനുകള് മാഞ്ഞത് കാല്നടയാത്രികരെ വലക്കുന്നു. തലങ്ങും വിലങ്ങും പായുന്ന വാഹനങ്ങള്ക്കിടയിലൂടെ ജീവനും കൈയ്യില്പിടിച്ചാണ് യാത്രക്കാര് റോഡ് മുറിച്ചു കടക്കുന്നത്.
സര്ക്കാര് ഹൈസ്ക്കൂള് പരിസരം,സെന്റര് ജംഗ്ഷന്,ബസ് സ്റ്റാന്ഡ് ജംഗ്ഷന്,താലൂക്കാശുപത്രി ജംഗ്ഷന്, അപ്സര കുന്ന് കവല തുടങ്ങിയ ഇടങ്ങളിലായിരുന്നു അടിമാലി ടൗണില് സീബ്രാലൈനുകള് ഉണ്ടായിരുന്നത്.
ദിനം പ്രതി ആയിരക്കണക്കിന് വാഹനങ്ങള് തലങ്ങും വിലങ്ങും പായുന്ന ടൗണില് സീബ്രാലൈനുകള് പൂര്ണ്ണമായി മാഞ്ഞു പോയത് കാല്നടയാത്രികര്ക്ക് വലിയ ബുദ്ധിമുട്ട് ജനിപ്പിക്കുന്നു. ഏറ്റവും തിരക്കേറിയ സെന്റര് ജംഗ്ഷനില് നിന്നും സര്ക്കാര് ആശുപത്രിയിലേക്കെത്താന് റോഡ് മുറിച്ചു കടക്കണമെങ്കില് രോഗികള് നല്ല നേരം നോക്കണം.ടൗണില് സീബ്രാലൈനുകള് വരച്ച് ചേര്ക്കാന് ബന്ധപ്പെട്ട വകുപ്പുകള് നടപടി കൈകൊള്ളണമെന്ന് കാല്നടയാത്രക്കാര് ആവശ്യപ്പെടുന്നു. മുന്കാലങ്ങളെ അപേക്ഷിച്ച് അടിമാലി ടൗണിലെത്തുന്ന വാഹനങ്ങളുടെ എണ്ണം ക്രമാതീതമായി വര്ധിച്ചിട്ടുണ്ട്.
സീബ്രാലൈനുകള് മാഞ്ഞതോടെ റോഡ് മുറിച്ചു കടക്കാന് ശ്രമിക്കുന്ന കാല്നടയാത്രക്കാരെ വാഹന മോടിക്കുന്നവര് ഗൗനിക്കാറേയില്ല.അടിമാലി സര്ക്കാര് ഹൈസ്ക്കൂളിന് മുമ്പില് വിദ്യാര്ത്ഥികള് ഏറെ പണിപ്പെട്ടാണ് പാത മുറിച്ച് കടക്കുന്നത്. പ്രായമായവര് പാത മുറിച്ച് കടക്കുമ്പോള് പലപ്പോഴും തലനാരിഴക്കാണ് അപകടം ഒഴിവായി പോകുന്നത്. രാവിലെയും വൈകിട്ടും റോഡ് മുറിച്ചു കടക്കാന് ട്രാഫിക് പോലീസിന്റെ സഹായം ലഭിക്കുന്നുണ്ടെങ്കിലും ശേഷിക്കുന്ന സമയങ്ങളില് വര കടക്കണമെങ്കില് യാത്രക്കാരുടെ തലവര നന്നാകണം.
