മാങ്കുളം: മധ്യവേനല്‍ അവധിക്കാലം പടി വാതില്‍ക്കല്‍ എത്തിയതോടെ മാങ്കുളത്തിന്റെ വിനോദ സഞ്ചാര മേഖല പ്രതീക്ഷയിലാണ്. ഏപ്രില്‍, മെയ് മാസങ്ങളില്‍ സഞ്ചാരികള്‍ കൂടുതലായി മാങ്കുളത്തേക്കെത്തുമെന്നാണ് വിനോദ സഞ്ചാരമേഖലയില്‍ പ്രവര്‍ത്തിക്കുന്നവരുടെ പ്രതീക്ഷ. ഓണവും ക്രിസ്തുമസും പോലുള്ള ആഘോഷ സമയങ്ങളില്‍ സഞ്ചാരികളുടെ തിരക്കനുഭവപ്പെടാറുണ്ടെങ്കിലും മധ്യവേനലവധിക്കാലത്താണ് സഞ്ചാരികള്‍ കൂടുതലായി മാങ്കുളത്തേക്കും ആനക്കുളത്തേക്കുമെത്താറ്.
കാടിന്റെ വശ്യമനോഹാരിതയും കാട്ടരുവികളുടെയും പുഴകളുടെയും ആകര്‍ഷണീയമായ കാഴ്ച്ചകളും ജീപ്പ് സഫാരിയും തേയിലതോട്ടങ്ങളുടെയും ഏലക്കാടുകളുടെയും പരന്നകാഴ്ച്ചകളും ആനക്കുളത്തെ ആനക്കൂട്ടവും ആനക്കുളിയുമൊക്കെയാണ് മാങ്കുളത്തിന്റെ വിനോദ സഞ്ചാരമേഖലയെ സജീവമാക്കുന്നത്. വേനല്‍ കനത്ത് തുടങ്ങുന്ന ഡിസംബര്‍ മുതല്‍ കാട്ടാനകൂട്ടങ്ങള്‍ ആനക്കുളത്തെ നിത്യ കാഴ്ച്ചയാണ്. പട്ടാപകല്‍ പോലും തൊട്ടരികില്‍ നിന്ന് കാട്ടാനകളേയും ഈറ്റച്ചോലയാറ്റിലെ ആനകളുടെ നീരാട്ടും ആനക്കുളത്തെ സഞ്ചാരികളുടെ ഇഷ്ട കേന്ദ്രമാക്കുന്നു. കാനന ഭംഗിയാസ്വദിച്ചുള്ള ജീപ്പ് സഫാരിയാണ് ഇവിടേക്കെത്തുന്ന സഞ്ചാരികളുടെ മറ്റൊരിഷ്ട വിനോദം.
മധ്യവേനലവധിക്ക് ശേഷമുള്ള മണ്‍സൂണ്‍ ടൂറിസവും മാങ്കുളത്തേക്ക് സഞ്ചാരികളേ ആകര്‍ഷിക്കുന്നതാണ്. മഴക്കാലങ്ങളില്‍ വന്യത കൈവരിക്കുന്ന അരഡസനിലധികം വെള്ളച്ചാട്ടങ്ങളാണ് മഴക്കാലത്ത് മാങ്കുളത്തിന്റെ ഭംഗി. സീസണ്‍ കാലത്തെ പ്രതീക്ഷയോടെ കണ്ട് വിനോദ സഞ്ചാരമേഖലയില്‍ പ്രവര്‍ത്തിക്കുന്നവര്‍ മുന്നൊരുക്കങ്ങള്‍ നടത്തുകയാണ്. കാട്ടുമൃഗശല്യവും കാര്‍ഷിക മേഖലയിലെ വിലത്തകര്‍ച്ചയും മൂലം മാങ്കുളത്തെ വലിയൊരു വിഭാഗം ആളുകള്‍ വരുമാനം കണ്ടെത്താനുള്ള മാര്‍ഗ്ഗമായി വിനോദ സഞ്ചാരമേഖലയിലേക്ക് തിരിഞ്ഞിട്ടുണ്ട്. ക്രിസ്തുമസ് പുതുവത്സരാഘോഷങ്ങള്‍ക്ക് ശേഷം പരീക്ഷക്കാലമായതോടെ ഇപ്പോള്‍ സഞ്ചാരികളുടെ തിരക്കില്‍ കുറവ് വന്നിട്ടുണ്ട്. മുന്‍കാലങ്ങളിലെന്ന പോലെ ഈ മധ്യവേനലവധിക്കാലവും മാങ്കുളത്തെ സഞ്ചാരികള്‍ സജീവമാക്കുമെന്നാണ് പ്രതീക്ഷ.
പേമരം വളവില്‍ സുരക്ഷ ഒരുക്കാന്‍ വൈകരുത്
കല്ലാര്‍ മുതല്‍ ആനക്കുളം വരെയുള്ള റോഡില്‍ ഏറ്റവും അധികം അപകട സാധ്യത നിലനില്‍ക്കുന്ന പ്രദേശങ്ങളിലൊന്നാണ് മാങ്കുളം ആനക്കുളം റോഡിലെ പേമരം വളവ്. നിരവധി വാഹനാപകടങ്ങള്‍ ഇതിനോടകം സംഭവിച്ച് കഴിഞ്ഞു. ബി എം ബി സി നിലവാരത്തില്‍ റോഡ് മുഖം മിനുക്കും മുമ്പും ഇവിടെ അപകടങ്ങള്‍ സംഭവിച്ചിട്ടുണ്ട്. റോഡ് നവീകരിച്ച ശേഷവും അപകടങ്ങള്‍ തുടര്‍ക്കഥയാകുന്നു.
സുരക്ഷക്കായി ഇപ്പോള്‍ സ്ഥാപിച്ചിട്ടുള്ള ക്രാഷ് ബാരിയറുകളും അപകട മുന്നറിയിപ്പ് ബോര്‍ഡുകളും സുരക്ഷ ഉറപ്പാക്കാന്‍ പോന്നതല്ലെന്ന് പരിസരവാസികള്‍ പറയുന്നു. ഇറക്കവും കൊടുംവളവും നിറഞ്ഞ ഭാഗമാണിവിടം. ആദ്യമായി എത്തുന്നവര്‍ക്ക് റോഡിന്റെ ദിശ പെട്ടന്ന് മനസ്സിലാകില്ല. റോഡ് നവീകരിച്ചതോടെ വാഹനങ്ങള്‍ ഇതുവഴി വേഗതയില്‍ കടന്നു പോകുന്ന സാഹചര്യമുണ്ട്. മുമ്പ് വാഹനങ്ങള്‍ അപകടത്തില്‍ പെട്ടപ്പോഴൊക്കെയും തലനാരിഴക്കാണ് വലിയ അപകടമൊഴിവായി പോയത്.
മുന്നറിയിപ്പ് ബോര്‍ഡും ക്രാഷ് ബാരിയറും സ്ഥാപിച്ചിട്ടും അപകടം കുറയാത്ത സാഹചര്യത്തില്‍ പേമരം വളവാരംഭിക്കുന്ന ഭാഗത്തും അവസാനിക്കുന്ന ഭാഗത്തും വീതി വര്‍ധിപ്പിച്ച് വളവ് നിവര്‍ത്തിയാല്‍ മാത്രമെ പ്രദേശത്തെ അപകട സാധ്യത പൂര്‍ണ്ണമായി ഒഴിവാക്കാനാകുവെന്ന് പ്രദേശവാസികള്‍ പറയുന്നു. വളവാരംഭിക്കുന്ന ഭാഗത്ത് സംരക്ഷണ ഭിത്തി നിര്‍മ്മിച്ച് മണ്ണിട്ട് നികത്തിയാല്‍ വീതി വര്‍ധിക്കും. വളവ് അവസാനിക്കുന്ന ഭാഗത്തെ മണ്‍തിട്ട നീക്കിയാല്‍ വീതി വര്‍ധിക്കുന്നതിനൊപ്പം റോഡിന്റെ ദിശയും വ്യക്തമാകും. സമീപത്തെ വീടിന് സുരക്ഷ ഒരുക്കാന്‍ ഈ ഭാഗത്ത് സംരക്ഷണ ഭിത്തിയും കെട്ടി നല്‍കണം.
വാഹനങ്ങളുടെ വേഗത നിയന്ത്രിക്കാന്‍ ഇറക്കം ആരംഭിക്കുന്നതിന് മുമ്പ് ഹമ്പ് സ്ഥാപിക്കണമെന്നും കൈനഗിരി മുതല്‍ ആനക്കുളം വരെയുള്ള റോഡിലെ കൊടും വളവുകളും കുത്തിറക്കവും അപകട സാധ്യതയും സൂചിപ്പിച്ച് വിവിധയിടങ്ങളില്‍ സൂചനാ ബോര്‍ഡുകള്‍ സ്ഥാപിക്കണമെന്നും ആവശ്യമുണ്ട്. മധ്യവേനല്‍ അവധി ആരംഭിക്കുന്നതോടെ മാങ്കുളത്തേക്കെത്തുന്ന സഞ്ചാരികളുടെ തിരക്ക് വര്‍ധിക്കും. അതിന് മുമ്പായി അപകടം നിയന്ത്രിക്കുവാനുള്ള ഇടപെടല്‍ ഉണ്ടാകണമെന്നാണ് ആവശ്യം.
