സാഹസികതക്ക് മുതിര്‍ന്നാല്‍ ഗ്യാപ്പ് റോഡില്‍ പൂട്ടു വീഴും; നടപടി കടുപ്പിക്കാന്‍ മോട്ടോര്‍ വാഹനവകുപ്പ്
മൂന്നാര്‍: മൂന്നാര്‍ ഗ്യാപ്പ് റോഡില്‍ നിയമം ലംഘിച്ച് വാഹനമോടിക്കുന്നവരുടെ എണ്ണം വര്‍ധിക്കുന്ന സാഹചര്യത്തില്‍ പരിശോധനയും നടപടിയും കടുപ്പിക്കാനൊരുങ്ങി മോട്ടോര്‍ വാഹനവകുപ്പ്. മുഖം മിനുക്കിയതോടെ മൂന്നാര്‍ ഗ്യാപ്പ് റോഡ് വാഹനയാത്രികരുടെ ഇഷ്ടപാതയാണ്.മൂന്നാറിന്റെ കാഴ്ച്ചകള്‍ കാണുന്നതിനൊപ്പം നവീകരിച്ച പാതയിലൂടെയുള്ള ഡ്രൈവിംഗും ആളുകള്‍ ആസ്വദിക്കാറുണ്ട്. എന്നാല്‍ ഗ്യാപ്പ് റോഡില്‍ നിയമം ലംഘിച്ച് വാഹനമോടിക്കുന്നവരുടെ എണ്ണം വര്‍ധിക്കുന്നുവെന്നാണ് പരാതി. ഗ്യാപ്പ് റോഡിലൂടെ സാഹസികവും അപകടകരവുമായി യുവാക്കള്‍ വാഹനമോടിച്ച രണ്ട് സംഭവങ്ങളാണ് അടുത്തിടെ മോട്ടോര്‍വാഹനവകുപ്പിന്റെ ശ്രദ്ധയില്‍പ്പെട്ടത്.
ഈ സാഹചര്യത്തില്‍ ഗ്യാപ്പ് റോഡിലെ നിയമ ലംഘകരെ കണ്ടെത്താനുള്ള നടപടിയും കടുപ്പിക്കാനൊരുങ്ങുകയാണ് മോട്ടോര്‍ വാഹനവകുപ്പ്. നവമാധ്യമങ്ങളില്‍ അപ് ലോഡ് ചെയ്യുന്നതിനും മറ്റുമായാണ് യുവാക്കള്‍ വാഹനങ്ങളില്‍ ഇരുന്ന് അപകടകരവും സാഹസികവുമായി ദൃശ്യങ്ങള്‍ പകര്‍ത്താറ്. വിനോദ സഞ്ചാരികളുമായി പോകുന്ന ജീപ്പ് സഫാരിക്കാരില്‍ ചിലരും അമിതവേഗതയില്‍ വാഹനമോടിക്കാറുണ്ട്.
അപകടകരമായി വാഹനമോടിക്കുന്നവര്‍ക്ക് മാത്രമല്ല റോഡിലെ മറ്റ് വാഹനയാത്രികര്‍ക്കും കാല്‍നടയാത്രികര്‍ക്കുമൊക്കെ സാഹസവും അശ്രദ്ധയും ഭീഷണിയാകുന്നു.ഗ്യാപ്പ് റോഡില്‍ നിയമലംഘകര്‍ക്കെതിരെ നടപടി വേണമെന്ന ആവശ്യം ശക്തമായ സാഹചര്യത്തിലാണ് മോട്ടോര്‍ വാഹന വകുപ്പിന്റെ ഇടപെടലിന് വഴിയൊരുങ്ങുന്നത്.
