അടിമാലി: അടിമാലി എസ് എന്‍ ഡി പി വൊക്കേഷണല്‍ ഹയര്‍സെക്കണ്ടറി സ്‌കൂളില്‍ സ്‌കില്‍ എക്സിബിഷന്‍ നടന്നു. സൃഷ്ടി റ്റുകെ24എന്ന പേരിലാണ് എക്സിബിഷന്‍ സംഘടിപ്പിച്ചത്. ജില്ലാ കളക്ടര്‍ വി വിഘ്‌നേശ്വരി സ്‌കില്‍ എക്സിബിഷന്റെ ഉദ്ഘാടനം നിര്‍വ്വഹിച്ചു. സ്കൂൾ മാനേജർ ബിജു മാധവൻ അധ്യക്ഷത വഹിച്ചു.
വിവിധ സാങ്കേതിക മുന്നേറ്റങ്ങള്‍ പ്രദര്‍ശിപ്പിക്കുകയെന്നതാണ് എക്സിബിഷന്റെ ലക്ഷ്യമെന്ന് സ്‌കൂള്‍ അധികൃതര്‍ പറഞ്ഞു. സ്‌കൂളിലെ ഇലക്ട്രിക്കല്‍, മെക്കാനിക്കല്‍,ഓട്ടോ മൊബൈല്‍ കോഴ്സുകളില്‍ പഠിക്കുന്ന വിദ്യാര്‍ത്ഥികള്‍ തയ്യാറാക്കിയ നൂതന കണ്ടുപിടുത്തങ്ങളും പോലീസ്, ഫയര്‍ഫോഴ്സ്, കെ എസ് ഇ ബി തുടങ്ങി വിവിധ വകുപ്പുകളുടെ സ്റ്റാളുകളും എക്സിബിഷന്റെ ഭാഗമായി ഒരുക്കിയിരുന്നു. ഐഎസ്ആർഒ സ്പേസ് ഓൺ വീൽസ് എക്സിബിഷനും പരിപാടിയുടെ ഭാഗമായി ഒരുക്കി. വിവിധ സ്റ്റാളുകളുടെ ഉദ്ഘാടനം അടിമാലി ബ്ലോക്ക് പഞ്ചായത്ത് പ്രസിഡന്റ് സോമന്‍ ചെല്ലപ്പന്‍, അടിമാലി ഗ്രാമപഞ്ചായത്ത് പ്രസിഡന്റ് സൗമ്യ അനില്‍, വിശ്വദീപ്തി പബ്ലിക് സ്‌കൂള്‍ പ്രിന്‍സിപ്പാള്‍ ഫാ. ഡോ. രാജേഷ് ജോര്‍ജ്ജ് എന്നിവര്‍ നിര്‍വ്വഹിച്ചു.
സാങ്കേതിക മേഖലയില്‍ ഉപരി പഠന തൊഴില്‍ സാധ്യത മുന്‍നിര്‍ത്തി തുടര്‍ വിദ്യാഭ്യാസം ലക്ഷ്യമിടുന്ന വിവിധ കോളേജുകളുടെ ടെക് കരിയര്‍ ഫെസ്റ്റും എക്സിബിഷന്റെ ഭാഗമായി നടന്നു.വിവിധ സ്‌കൂളുകളില്‍ നിന്നുള്ള വിദ്യാര്‍ത്ഥികളും പൊതുജനങ്ങളും ഉള്‍പ്പെടെ എക്‌സിബിഷനില്‍ സന്ദര്‍ശകരായി എത്തി.എന്‍ എസ് എസ് യൂണിറ്റ്, കുടുംബശ്രീ എന്നിവയുടെ നേതൃത്വത്തില്‍ ഭക്ഷണശാലകളും ക്രമീകരിച്ചിരുന്നു.
എക്സിബിഷന്റെ ഭാഗമായി നടന്ന ശ്വാന പ്രദര്‍ശനം കൗതുകം ജനിപ്പിക്കുന്ന തായി .ഓട്ടോ എക്‌സ്‌പോയും കാഴ്ച്ചക്കാരെ ആകര്‍ഷിച്ചു.ശാസ്ത്ര, പരീക്ഷണ രംഗത്ത് കുട്ടികള്‍ക്ക് തങ്ങളുടെ കഴിവുകള്‍ പ്രദര്‍ശിപ്പിക്കാനും മുമ്പോട്ട് പോകാനും കരുത്ത് പകരുന്നതായി മാറി സൃഷ്ടി റ്റുകെ24.
