അടിമാലിയില്‍ എം എല്‍ എ ഓഫീസിലേക്ക് ദളിത് കോണ്‍ഗ്രസ് മാര്‍ച്ച് സംഘടിപ്പിച്ചു
അടിമാലി: സംസ്ഥാനത്തെ പട്ടികവിഭാഗകാര്‍ക്ക് ബജറ്റില്‍ പ്ലാന്‍ അലോക്കേഷനായി ഉള്‍പ്പെടുത്തിയിരുന്ന 611 കോടി രൂപ വെട്ടിച്ചുരുക്കിയെന്നാണ് ഭാരതീയ ദളിത് കോണ്‍ഗ്രസിന്റെ ആരോപണം. സര്‍ക്കാരിന്റെ ഈ നടപടിക്കെതിരെ ഭരണകക്ഷിയിലെ 14 പട്ടിക ജാതി സംവരണ വിഭാഗത്തില്‍പ്പെട്ട എം എല്‍ എമാര്‍ പ്രതികരിച്ചില്ലെന്നും ദളിത് കോണ്‍ഗ്രസ് ആരോപിക്കുന്നു. ഇതില്‍ പ്രതിഷേധിച്ചാണ് സംസ്ഥാനത്ത് 14 എം എല്‍ എമാരുടെയും ഓഫീസിലേക്ക് ദളിത് കോണ്‍ഗ്രസ് മാര്‍ച്ച് സംഘടിപ്പിച്ചത്. അടിമാലിയില്‍ പ്രവര്‍ത്തിക്കുന്ന അഡ്വ. എ രാജ എം എല്‍ എയുടെ ഓഫീസിലേക്ക് പ്രകടനമായി എത്തിയ പ്രവര്‍ത്തകരെ ഓഫീസിന് മുമ്പില്‍ പോലീസ് തടഞ്ഞു.തുടര്‍ന്ന ധര്‍ണ്ണാ സമരം മുന്‍ എം എല്‍ എ എ കെ മണി ഉദ്ഘാടനം ചെയ്തു.
ഭാരതീയ ദളിത് കോണ്‍ഗ്രസ് അടിമാലി, ദേവികുളം ബ്ലോക്ക് കമ്മിറ്റികളുടെ നേതൃത്വത്തിലാണ് പ്രതിഷേധ സമരം നടന്നത്. ദളിത് കോണ്‍ഗ്രസ് ജില്ലാ പ്രസിഡന്റ് പി എ സജി അധ്യക്ഷത വഹിച്ചു. ദളിത് കോണ്‍ഗ്രസിന്റെയും കോണ്‍ഗ്രസിന്റെയും കോണ്‍ഗ്രസിന്റെ വിവിധ പോഷക സംഘടനകളുടെയും പ്രതിനിധികള്‍ സമരത്തില്‍ സംസാരിച്ചു.
