കൂമ്പന്‍പാറയില്‍ പ്രവര്‍ത്തിക്കുന്ന പൊതുശ്മശാനത്തിന്റെ അറ്റകുറ്റപ്പണികള്‍ ആരംഭിച്ചു
അടിമാലി: അടിമാലി ഗ്രാമപഞ്ചായത്തിന് കീഴില്‍ കൂമ്പന്‍പാറയില്‍ പ്രവര്‍ത്തിക്കുന്ന പൊതുശ്മശാനത്തിന്റെ അറ്റകുറ്റപ്പണികള്‍ ആരംഭിച്ചു. ശാന്തികവാടമെന്ന പേരിലാണ് കൂമ്പന്‍പാറയില്‍ അടിമാലി ഗ്രാമപഞ്ചായത്തിന് കീഴില്‍ പൊതുശ്മശാനം പ്രവര്‍ത്തിക്കുന്നത്. അടിമാലിയുടെ സമീപ പഞ്ചായത്തുകളും പൊതുശ്മശാനത്തിന്റെ സേവനം പ്രയോജനപ്പെടുത്തുന്നുണ്ട്. എന്നാല്‍ നാളുകളായി അറ്റകുറ്റപ്പണികള്‍ നടക്കുന്നില്ലെന്ന പരാതി പൊതുശ്മശാനവുമായി ബന്ധപ്പെട്ട് ഉയര്‍ന്നിരുന്നു. ഈ സാഹചര്യത്തിലാണിപ്പോള്‍ പൊതുശ്മശാനത്തിന്റെ അറ്റകുറ്റപ്പണികള്‍ ആരംഭിച്ചിട്ടുള്ളത്. 28ലക്ഷത്തിലധികം രൂപ ചിലവഴിച്ചാണ് അറ്റകുറ്റപ്പണികള്‍ നടത്തുന്നതെന്ന് ഗ്രാമപഞ്ചായത്തധികൃതര്‍ പറഞ്ഞു. ഒരു മാസക്കാലം കൊണ്ട് അറ്റകുറ്റപ്പണികള്‍ പൂര്‍ത്തീകരിക്കാമെന്നാണ് ഗ്രാമപഞ്ചായത്തിന്റെ പ്രതീക്ഷ. ഏറ്റവും ആവശ്യഘട്ടത്തില്‍ മൂന്നാറില്‍ പ്രവര്‍ത്തിക്കുന്ന പൊതുശ്മശാനം ഉപയോഗിക്കാന്‍ ക്രമീകരണമൊരുക്കിയ ശേഷമാണ് നവീകരണത്തിനായി കൂമ്പന്‍പാറയിലെ ശ്മശാനം അടച്ചിട്ടുള്ളതെന്നും ഗ്രാമപഞ്ചായത്തധികൃതര്‍ വ്യക്തമാക്കി. ശ്മാശാനത്തിനുള്ളില്‍ സ്ഥാപിച്ചിട്ടുള്ള യന്ത്രസാമഗ്രികളുടെയടക്കം നവീകരണജോലികള്‍ പൂര്‍ത്തിയാക്കും. കേരള സ്റ്റേറ്റ് ഇന്‍ഡസ്ട്രിയല്‍ എന്റര്‍പ്രൈസസ് ആണ് നവീകരണ ജോലികള്‍ എടുത്തിട്ടുള്ളത്.
