മൂന്നാര്‍: കുറുമാറിയെത്തി വൈസ് പ്രസിഡന്റായ അംഗത്തെ അയോഗ്യനാക്കിയതിനെത്തുടര്‍ന്ന് ഒഴിവുവന്ന മൂന്നാര്‍ പഞ്ചായത്ത് വൈസ് പ്രസിഡന്റ് തിരഞ്ഞെടുപ്പ് നാളെ നടക്കും. രാവിലെ 11ന് പഞ്ചായത്ത് ഹാളില്‍ നടക്കുന്ന തിരഞ്ഞെടുപ്പില്‍ താലൂക്ക് സ്റ്റാറ്റിസ്റ്റിക്കല്‍ ഓഫിസറാണ് വരണാധികാരി. കഴിഞ്ഞ 25നാണ് എല്‍ഡിഎഫില്‍നിന്ന് കൂറുമാറി കോണ്‍ഗ്രസിലെത്തി മൂന്നാര്‍ പഞ്ചായത്ത് വൈസ് പ്രസിഡന്റായ വി ബാലചന്ദ്രനെ തിരഞ്ഞെടുപ്പു കമ്മിഷന്‍ കുറുമാറ്റ നിരോധന നിയമപ്രകാരം അയോഗ്യനാക്കിയത്.
ഇതെത്തുടര്‍ന്ന് ഇയാള്‍ക്ക് വൈസ് പ്രസിഡന്റ് സ്ഥാനം നഷ്ടപ്പെട്ടിരുന്നു. ഇതേ തുടര്‍ന്നാണ് നാളെ പഞ്ചായത്തില്‍ വീണ്ടും വൈസ് പ്രസിഡന്റ് തിരഞ്ഞെടുപ്പ് നടക്കുന്നത്. നിലവില്‍ കോണ്‍ഗ്രസാണ് മൂന്നാര്‍ പഞ്ചായത്ത് ഭരിക്കുന്നത്. 21 അംഗ ഭരണസമിതിയില്‍ കോണ്‍ഗ്രസിന് 11, എല്‍ഡിഎഫ് 8 എന്നിങ്ങനെയാണ് അംഗബലം. കൂറുമാറ്റ നിരോധന നിയമപ്രകാരം കഴിഞ്ഞ തദ്ദേശ ഭരണ തിരഞ്ഞെടുപ്പിന് ശേഷം മൂന്നാര്‍ പഞ്ചായത്തില്‍ 4 പേരെയാണു തിരഞ്ഞെടുപ്പു കമ്മിഷന്‍ അയോഗ്യരാക്കിയത്. കോണ്‍ഗ്രസില്‍ നിന്നും എല്‍ഡിഎഫിനൊപ്പം ചേര്‍ന്ന് പ്രസിഡന്റ്, വൈസ് പ്രസിഡന്റ് സ്ഥാനങ്ങള്‍ വഹിച്ചിരുന്ന ആര്‍.പ്രവീണ, എം. രാജേന്ദ്രന്‍, സിപിഐയില്‍ നിന്നും കോണ്‍ഗ്രസിലെത്തിയ തങ്കമുടി, സിപിഎമ്മില്‍ നിന്നും കോണ്‍ഗ്രസിലെത്തി വൈസ് പ്രസിഡന്റായ ബാലചന്ദ്രന്‍ എന്നിവരാണ് അയോഗ്യരായത്. ടി ഗണേശനാണ് എല്‍ ഡി എഫിന്റെ വൈസ് പ്രസിഡന്റ് സ്ഥാനാര്‍ത്ഥിയെന്നാണ് വിവരം. വൈസ് പ്രസിഡന്റ് സ്ഥാനം ആവശ്യപ്പെട്ട് കോണ്‍ഗ്രസില്‍ വിവിധ അംഗങ്ങള്‍ രംഗത്തെത്തിയിട്ടുള്ളതായാണ് സൂചന.
