കേരള സ്റ്റേറ്റ് സര്‍വ്വീസ് പെന്‍ഷണേഴ്‌സ് യൂണിയന്റെ മുപ്പത്തിമൂന്നാമത് ഇടുക്കി ജില്ലാ സമ്മേളനം അടിമാലിയില്‍ നടന്നു
അടിമാലി: കേരള സ്റ്റേറ്റ് സര്‍വ്വീസ് പെന്‍ഷണേഴ്‌സ് യൂണിയന്റെ മുപ്പത്തിമൂന്നാമത് ഇടുക്കി ജില്ലാ സമ്മേളനം അടിമാലിയില്‍ നടന്നു. യൂണിയന്റെ സംസ്ഥാന സമ്മേളനം ഏപ്രില്‍ 27,28,29,30 തിയതികളില്‍ എറണാകുളത്ത് വച്ചാണ് നടക്കുന്നത്. ഇതിന് മുന്നോടിയായിട്ടാണ് സംഘടനയുടെ മൂപ്പത്തിമൂന്നാമത് ജില്ലാ സമ്മേളനം അടിമാലിയില്‍ നടന്നത്.പത്ത് വര്‍ഷത്തിന് ശേഷമാണ് സംഘടനയുടെ ജില്ലാ സമ്മേളനത്തിന് അടിമാലി വേദിയായത്. അടിമാലി ഗ്രാമപഞ്ചായത്ത് ഹാളില്‍ നടന്ന പൊതു സമ്മേളനം അഡ്വ. എ. രാജ എം എല്‍ എ ഉദ്ഘാടനം ചെയ്തു.
സമ്മേളനത്തിന് മുന്നോടിയായി രാവിലെ 9.30 ന് ഗവണ്‍മെന്റ് ഹൈസ്‌ക്കൂള്‍ പരിസരത്ത് നിന്ന് പെന്‍ഷന്‍ കുടുംബാംഗങ്ങള്‍ അണിനിരക്കുന്ന പ്രകടനം ആരംഭിച്ചു.പ്രകടനം പഞ്ചായത്ത് ഗ്രൗണ്ടില്‍ സമാപിച്ച ശേഷം ജില്ലാ പ്രസിഡന്റ് കെ.കെ സുകുമാരന്‍ പതാക ഉയര്‍ത്തി. തുടര്‍ന്ന് അടിമാലി ബ്ലോക്ക് സാംസ്‌കാരിക വേദിയുടെ കലാകാരന്മാര്‍ ആലപിച്ച സ്വാഗത ഗാനത്തോടെ ഉദ്ഘാടന സമ്മേളനം ആരംഭിച്ചു. സംഘടന ജില്ലാ പ്രസിഡന്റ് കെ കെ സുകുമാരന്‍ അധ്യക്ഷത വഹിച്ചു.അടിമാലി ഗ്രാമപഞ്ചായത്ത് പ്രസിഡന്റ് സൗമ്യ അനില്‍, എം ജെ ലില്ലി, വി കെ മാണി, വി വി ഫിലിപ്പ്, കെ എം ഗോപി, എ എന്‍ ചന്ദ്രബാബു തുടങ്ങിയവര്‍ സംസാരിച്ചു. സമ്മേളനത്തില്‍ വിവിധയാളുകള്‍ക്ക് ആദരമൊരുക്കി.
പ്രതിനിധി സമ്മേളനം സംഘടന സംസ്ഥാന ജനറല്‍ സെക്രട്ടറി ആര്‍ രാഘുനാഥന്‍ നായര്‍ ഉദ്ഘാടനം ചെയ്തു. ജില്ലാ സെക്രട്ടറി എ എന്‍ ചന്ദ്രബാബു റിപ്പോര്‍ട്ടും, ജില്ലാ ട്രഷറര്‍ റ്റി ചെല്ലപ്പന്‍ കണക്കും അവതരിപ്പിച്ചു. സംസ്ഥാന കമ്മിറ്റി അംഗം എം.എസ്. ചന്ദ്രന്‍ വരണാധികാരിയായി തിരഞ്ഞെടുപ്പും നടന്നു.സംഘടനക്ക് ജില്ലയില്‍ ഏഴായിരത്തിലധികം അംഗങ്ങളുണ്ട്.
