അടിമാലി: അടിമാലി ഗ്രാമപഞ്ചായത്ത് പതിനേഴാംവാര്‍ഡ് മച്ചിപ്ലാവ് വെസ്റ്റ് എ ഡി എസിന്റെ വാര്‍ഷികാഘോഷം നടന്നു.മച്ചിപ്ലാവ് സര്‍ക്കാര്‍ ഹൈസ്‌ക്കൂളിലായിരുന്നു പരിപാടി നടന്നത്. ഗ്രാമപഞ്ചായത്തംഗം റൂബി സജി പരിപാടി ഉദ്ഘാടനം ചെയ്തു. കുടുംബശ്രീ അംഗങ്ങളുടെയും ബാലസഭാ കുട്ടികളുടെയും വിവിധ കലാപരിപാടികളും വാര്‍ഷികാഘോഷത്തിന്റെ ഭാഗമായി ഒരുക്കിയിരുന്നു.
വാര്‍ഡില്‍ എസ് എസ് എല്‍ സി, പ്ലസ് ടു പരീക്ഷകളില്‍ മികച്ച വിജയം കരസ്ഥമാക്കിയ വിദ്യാര്‍ത്ഥികളെയും മുതിര്‍ന്ന അംഗത്തേയും 25 വര്‍ഷം പൂര്‍ത്തിയാക്കിയ അയല്‍കൂട്ട സംഘങ്ങളേയും ചടങ്ങില്‍ അനുമോദിച്ചു. എഡി എസ് പ്രസിഡന്റ് അമ്മിണി ഏലിയാസ് ഉദ്ഘാടന ചടങ്ങില്‍ അധ്യക്ഷത വഹിച്ചു.സി ഡി എസ് ചെയര്‍പേഴ്സണ്‍ ജിഷ സന്തോഷ് മുഖ്യപ്രഭാഷണം നടത്തി. മേഴ്സി പൗലോസ്, സിനി രാജേഷ്, സുദിനി വിജയന്‍, ലീലാമ്മ ബെന്നി, റെയ്ച്ചല്‍ സജി, അമ്മിണി കുഞ്ഞ്, അമ്പിളി രഞ്ചിത്ത്, മിനി വിജയന്‍, ഷേര്‍ളി തുടങ്ങിയവര്‍ സംസാരിച്ചു.
