സ്‌കൂളിലെ വൈദ്യുതി പ്രശ്നം : എസ്എഫ്‌ഐയുടെ നേതൃത്വത്തില്‍ മൂന്നാര്‍ പഞ്ചായത്തിലേക്ക് മാര്‍ച്ചും ധര്‍ണയും നടത്തി
മൂന്നാര്‍: മൂന്നാര്‍ സര്‍ക്കാര്‍ വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ വൈദ്യുതി ലഭ്യമാക്കുന്നതുമായി ബന്ധപ്പെട്ട് കെട്ടിട നമ്പര്‍ നല്‍കുന്നതില്‍ ഉദ്യോഗസ്ഥര്‍ അനാസ്ഥ പുലര്‍ത്തുന്നുവെന്നാരോപിച്ച് എസ്എഫ്‌ഐ മൂന്നാര്‍ ഏരിയ കമ്മിറ്റിയുടെ നേതൃത്വത്തില്‍ മൂന്നാര്‍ പഞ്ചായത്തിലേക്ക് മാര്‍ച്ചും ധര്‍ണയും നടത്തി. മൂന്നാര്‍ സര്‍ക്കാര്‍ വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ വൈദ്യുതിയില്ലാത്തത് അധ്യാപകര്‍ക്കും വിദ്യാര്‍ത്ഥികള്‍ക്കും വലിയ പ്രായോഗിക ബുദ്ധിമുട്ടുയര്‍ത്തുന്ന സാഹചര്യത്തിലാണ് സ്‌കൂളില്‍ വൈദ്യുതി ലഭ്യമാക്കുന്നതുമായി ബന്ധപ്പെട്ട് കെട്ടിട നമ്പര്‍ നല്‍കുന്നതില്‍ ഉദ്യോഗസ്ഥര്‍ അനാസ്ഥ പുലര്‍ത്തുന്നുവെന്നാരോപിച്ചാണ് മാര്‍ച്ചും ധര്‍ണയും നടത്തിയത്.
എസ് എഫ് ഐ മൂന്നാര്‍ ഏരിയ സെക്രട്ടറി എസ് രഞ്ചിത്ത് പ്രതിഷേധ സമരം ഉദ്ഘാടനം ചെയ്തു. ജോണ്‍ നിഗേഷ് പ്രതിഷേധ പരിപാടിയില്‍ അധ്യക്ഷനായി. അശ്വിന്‍, അരുണ്‍ എന്നിവര്‍ സംസാരിച്ചു. പഞ്ചായത്തില്‍ നിന്നും സ്‌കൂള്‍ കെട്ടിടത്തിന് നമ്പര്‍ നല്‍കാത്തത് മൂലം കെട്ടിടത്തിന് വൈദ്യുതി കണക്ഷന്‍ ലഭ്യമായിട്ടില്ലെന്നും സ്‌കൂള്‍ അധികൃതര്‍ നിരവധി തവണ നമ്പറിനായി അപേക്ഷ നല്‍കിയെങ്കിലും അനുകൂല നടപടിയുണ്ടായില്ലെന്നും എസ് എഫ് ഐ ആരോപിക്കുന്നു.
വൈദ്യുതി ലഭിക്കാന്‍ അപേക്ഷ സമര്‍പ്പിച്ചെങ്കിലും കെട്ടിട നമ്പര്‍ ഇല്ലാത്ത കാരണം പറഞ്ഞ് ബന്ധപ്പെട്ടവര്‍ അപേക്ഷ നിരാകരിക്കുകയാണ് ഉണ്ടായതെന്നും പ്രതിഷേധത്തില്‍ സംസാരിച്ചവര്‍ പറഞ്ഞു. വൈദ്യുതി ഇല്ലാത്തതിനാല്‍ സ്‌കൂളിലെ ലാബിന്റെ പ്രവര്‍ത്തനം താളം തെറ്റി. ശുചിമുറികളില്‍ വെള്ളവും ചുമന്നെത്തിക്കേണ്ടുന്ന സ്ഥിതിയുമുണ്ട്.
