അടിമാലി: ആള്‍ ഇന്ത്യ വീരശൈവമഹാസഭ ജില്ലാ കമ്മിറ്റിയുടെ നേതൃത്വത്തില്‍ ബസവേശ്വര ജയന്തി ആഘോഷം സംഘടിപ്പിച്ചു. സാമൂഹിക പരിഷ്‌കര്‍ത്താവും നവോത്ഥാന ശില്‍പ്പികളില്‍ ഒരാളുമായ മഹാഗുരു ശ്രീ ബസവേശ്വരന്റെ എണ്ണൂറ്റി തൊണ്ണൂറ്റി രണ്ടാം ജയന്തി ആഘോഷമാണ് സംഘടിപ്പിച്ചത്.ആനച്ചാലിലായിരുന്നു പരിപാടി നടന്നത്.സംഘടന സംസ്ഥാന ജനറല്‍ സെക്രട്ടറി പി എന്‍ വിനോദ് പരിപാടി ഉദ്ഘാടനം ചെയ്തു.
സംഘടനാ ജില്ലാ പ്രസിഡന്റ് ഗിരീഷ് എന്‍ പാലംതറ സമ്മേളനത്തില്‍ അധ്യക്ഷത വഹിച്ചു. വിവിധ തൊഴില്‍ മേഖലകളില്‍ പ്രവര്‍ത്തിക്കുന്നവരെ ചടങ്ങില്‍ ആദരിച്ചു. കലാപരിപാടികളും പിറന്നാള്‍ സദ്യയും ആഘോഷത്തിന്റെ ഭാഗമായി ഒരുക്കിയിരുന്നു. ശാന്തന്‍പാറ ഗ്രാമപഞ്ചായത്ത് പ്രസിഡന്റ് ലിജു വര്‍ഗ്ഗീസ്, വെള്ളത്തൂവല്‍ ഗ്രാമപഞ്ചായത്ത് വൈസ് പ്രസിഡന്റ് കെ ആര്‍ ജയന്‍, രജനി മാധവന്‍, മോഹനമേനോന്‍, ഇ കെ മോഹനന്‍, മോഹനന്‍ ഇലവുങ്കല്‍, ആള്‍ ഇന്ത്യ വീരശൈവമഹാസഭ ജില്ലാ കമ്മിറ്റി ഭാരവാഹികളായ എന്‍ വി ബാലചന്ദ്രന്‍, ബിജു ചീങ്കല്ലേല്‍, എന്‍ എസ് അനില്‍കുമാര്‍, ദീപ സുഭാഷ്, ബാബു ബി കെ, പി യു അരുണ്‍ കുമാര്‍ തുടങ്ങിയവര്‍ സംസാരിച്ചു. ബസവേശ്വര ജയന്തി അവധി ദിനമായി പ്രഖ്യാപിക്കണമെന്ന് യോഗം ആവശ്യപ്പെട്ടു.
