അടിമാലി: കുടുംബശ്രീ ജില്ലാ മിഷന്‍ നടപ്പിലാക്കുന്ന പട്ടിക വര്‍ഗ്ഗ സുസ്ഥിര വികസന പരിപാടിയുടെ ഭാഗമായുള്ള ജില്ലാതല ട്രൈബല്‍ യൂത്ത് ഫുട്‌ബോള്‍ ടൂര്‍ണ്ണമെന്റ് അടിമാലിയില്‍ നടന്നു. ആദിവാസി ഇടങ്ങളിലെ യുവജനതയെ കായികപരമായി മുമ്പോട്ട് നയിക്കുകയെന്ന ലക്ഷ്യത്തോടെയാണ് ടൂര്‍ണ്ണമെന്റ് അടിമാലിയില്‍ സംഘടിപ്പിച്ചത്. അടിമാലി ഇലവന്‍ ഫുട്‌ബോള്‍ ടര്‍ഫിലായിരുന്നു മത്സരങ്ങള്‍ നടന്നത്. ജില്ലയുടെ വിവിധ മേഖലകളില്‍ നിന്നുള്ള ടീമുകള്‍ ടൂര്‍ണ്ണമെന്റില്‍ ഏറ്റുമുട്ടി. അടിമാലി ഗ്രാമപഞ്ചായത്ത് പ്രസിഡന്റ് സൗമ്യ അനില്‍ ടൂര്‍ണ്ണമെന്റിന്റെ ഉദ്ഘാടനം നിര്‍വ്വഹിച്ചു.
ഗ്രാമപഞ്ചായത്ത് വൈസ് പ്രസിഡന്റ് അനസ് ഇബ്രാഹിം മത്സരങ്ങള്‍ കിക്ക് ഓഫ് ചെയ്തു. ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ സി ഡി ഷാജി മത്സരം ഫ്‌ളാഗ് ഓഫ് ചെയ്തു. ഉദ്ഘാടന ചടങ്ങില്‍ സി ഡി എസ് ചെയര്‍പേഴ്‌സണ്‍ ജിഷ സന്തോഷ് അധ്യക്ഷത വഹിച്ചു. വൈസ് ചെയര്‍പേഴ്‌സണ്‍ സിനി രാജേഷ്, ജില്ലാ പ്രോഗ്രാം മാനേജര്‍ സൂര്യ സി എസ് എന്നിവര്‍ ഉദ്ഘാടന ചടങ്ങില്‍ സംബന്ധിച്ചു.
