തകര്‍ന്ന നടപ്പുവഴിയുടെ ഭാഗം താല്‍ക്കാലിക സംവിധാനമൊരുക്കി യാത്രായോഗ്യമാക്കി
മൂന്നാര്‍: കനത്ത മഴയില്‍ തകര്‍ന്ന നടപ്പുവഴിയുടെ ഭാഗം താല്‍ക്കാലിക സംവിധാനമൊരുക്കി യാത്രായോഗ്യമാക്കി. മൂന്നാര്‍ ലക്ഷം നഗറില്‍ നിന്നും എം ജി നഗറിലേക്ക് പോകുന്ന നടപ്പുവഴിയുടെ ഒരു ഭാഗമായിരുന്നു കഴിഞ്ഞ ദിവസങ്ങളില്‍ പെയ്ത കനത്ത മഴയില്‍ തകര്‍ന്നത്. ഇതോടെ യാത്രക്കായി ഈ വഴിയെ ആശ്രയിച്ചിരുന്നവര്‍ ദുരിതത്തിലുമായി. പ്രദേശത്തെ ഇരുപതിലധികം കുടുംബങ്ങള്‍ ഇതു വഴിയായിരുന്നു സഞ്ചരിച്ച് വന്നിരുന്നത്. 2018ലെ പ്രളയത്തിലാണ് നടപ്പുവഴിയുടെ ഈ ഭാഗം തകര്‍ന്നത്.
പിന്നീട് ഇരുമ്പുപൈപ്പുപയോഗിച്ച് നടന്നു പോകാവുന്ന രീതിയില്‍ പാലത്തിന് സമാന രീതിയില്‍ സംവിധാനമൊരുക്കി. ഈ യാത്ര മാര്‍ഗ്ഗമായിരുന്നു കഴിഞ്ഞ ദിവസങ്ങളില്‍ പെയ്ത മഴയില്‍ തകര്‍ന്നത്. മഴ കുറഞ്ഞതോടെ പഞ്ചായത്തിന്റെ ഇടപെടലിലൂടെ വീണ്ടും സമാനരീതിയില്‍ പ്രദേശത്ത് യാത്രാ മാര്‍ഗ്ഗമൊരുക്കി. കുടുംബങ്ങള്‍ക്ക് നടന്നുപോകുവാന്‍ താല്‍ക്കാലിക സംവിധാനമൊരുക്കിയെങ്കിലും ഈ ഭാഗത്ത് ബലവത്തായ സംരക്ഷണ ഭിത്തി നിര്‍മ്മിച്ച് സുരക്ഷയും ഒപ്പം ഉറപ്പുള്ള നടപ്പാതയും ഒരുക്കി നല്‍കണമെന്നാണ് പ്രദേശവാസികളുടെ ആവശ്യം.
പഞ്ചായത്തിനെ കൊണ്ടു മാത്രം തകര്‍ന്ന് ഭാഗത്ത് നിര്‍മ്മാണം നടത്താന്‍ കഴിയില്ലെന്നും മറ്റ് സര്‍ക്കാര്‍ സംവിധാനങ്ങളുടെ ഭാഗത്തു നിന്നും നിര്‍മ്മാണത്തിന് കൂടുതല്‍ തുക അനുവദിക്കണമെന്നും ഗ്രാമപഞ്ചായത്തംഗം ആവശ്യപ്പെടുന്നു.
