ആയുര്‍വേദ ആശുപത്രികള്‍ കഴിച്ചവെയ്ക്കുന്നത് മികച്ച പ്രവര്‍ത്തനങ്ങള്‍ : ജില്ലാ പഞ്ചായത്ത് പ്രസിഡന്റ്
ജില്ലയിലെ ആയുര്‍വേദ ആശുപത്രികള്‍ മികച്ച പ്രവര്‍ത്തനമാണ് കാഴ്ച വെക്കുന്നതെന്ന് ജില്ലാ പഞ്ചായത്ത് പ്രസിഡന്റ് രാരിച്ചന്‍ നീറണാംകുന്നേല്‍
പറഞ്ഞു. ഭാരതീയ ചികിത്സാ വകുപ്പിന്റെയും ജില്ലാ പഞ്ചായത്തിന്റെയും ആഭിമുഖ്യത്തില്‍ സംഘടിപ്പിച്ച മാതൃവന്ദനം പദ്ധതിയുടെയും വയോനിധി പദ്ധതിയുടെയും ജില്ലാതല ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം.
സ്‌പോര്‍ട്‌സ് രംഗത്ത് പരിക്ക് പറ്റിയ തരങ്ങള്‍ക്ക് ചികിത്സ നല്‍കുന്ന ഒരു പ്രത്യേക വിഭാഗം തൊടുപുഴ ആയുര്‍വേദ ആശുപത്രിയില്‍ പ്രവര്‍ത്തിക്കുന്നുണ്ടെന്നും കേരളത്തിന് അകത്തും പുറത്തു നിന്നും ചികിത്സ നേടി ഭേദമായി പോകുന്നുണ്ട്.അത്തരത്തില്‍ ശ്രദ്ധ ആകര്‍ഷിക്കുന്ന പ്രവര്‍ത്തനങ്ങളാണ് ആയുര്‍വേദ വകുപ്പ് നടത്തുന്നത്. തനിമയാര്‍ന്ന ചികിത്സാരീതിയാണ് ആയുര്‍വേദത്തിന്റെതെന്നും വിരമിച്ചു പോയ ഡോക്ടര്‍മാര്‍ നല്‍കിയ സേവനം സ്മരിക്കാതിരിക്കാനാവില്ലെന്നും ആരോഗ്യമുള്ള സമൂഹത്തെ സൃഷ്ടിക്കുകയാണ് ലക്ഷ്യമെന്നും അദ്ദേഹം പറഞ്ഞു.
ഗര്‍ഭണികളുടെയും പ്രസവാനന്തരം അമ്മമാരുടെയും നവജാതശിശുക്കളുടെയും ആരോഗ്യസംഭക്ഷണം ആയുര്‍വേദത്തിലൂടെ ഉറപ്പുവരുത്തുക എന്ന ലക്ഷ്യത്തോടെ സര്‍ക്കാര്‍ ആയുര്‍വേദ സ്ഥാപനങ്ങളിലൂടെ മരുന്നുകളും സൗജന്യമായി ലഭ്യമാക്കുന്ന പദ്ധതിയാണ് ‘മാതൃവന്ദനം’. അറുപത് വയസ്സിന് മുകളില്‍ പ്രായമുള്ള രോഗികളുടെ ആരോഗ്യ പരിപാലനത്തിന് ഊന്നല്‍ നല്‍കിക്കൊണ് സൗജന്യ ചികിത്സ നല്‍കുന്ന പദ്ധതിയാണ് ‘വയോനിധി. ഈ പദ്ധതിയിലൂടെ വയോജനങ്ങള്‍ക്ക് ദൈനംദിന ജീവിതം സുഖപ്രദമാക്കുന്നതിനും ജീവിത നിലവാരം മെച്ചപ്പെടുത്തുന്നതിനും ആരോഗ്യപ്രദമായ വാര്‍ദ്ധക്യം നയിക്കുന്നതിനും സഹായകമാകുന്ന തരത്തിലുള്ള ഔഷധങ്ങളും വൈദ്യ നിര്‍ദ്ദേശങ്ങളും സൗജന്യമായി ലഭിക്കും. ഇരു പദ്ധതികളും ഇടുക്കി ജില്ലാ പഞ്ചായത്തിന്റെയും ഭാരതീയ ചികിത്സ വകുപ്പിന്റെയും സംയുക്താഭിമുഖ്യത്തില്‍ ജില്ലാ പഞ്ചായത്തിന്റെ 16 ഡിവിഷനുകളിലെയും സര്‍ക്കാര്‍ ആയുര്‍വേദ സ്ഥാപനങ്ങളിലൂടെ നടത്തപ്പെടുന്നു.
ജില്ലാ കളക്ടറേറ്റ് കോണ്‍ഫറന്‍സ് ഹാളില്‍ സംഘടിപ്പിച്ച പരിപാടിയില്‍ ജില്ലാ പഞ്ചായത്ത് വൈസ് പ്രസിഡന്റ് ഉഷ കുമാരി മോഹന്‍കുമാര്‍ അധ്യക്ഷത വഹിച്ചു. ജില്ലാ കളക്ടര്‍ ദിനേശന്‍ ചെറുവാട്ട് മുഖ്യ പ്രഭാഷണം നടത്തി. ഐഎസ്എം ജില്ലാ മെഡിക്കല്‍ ഓഫീസര്‍ ഡോ. ജെറോം വി കുര്യന്‍ വിഷയാവതരണം നടത്തി. പരിപാടിയില്‍ ജില്ലയിലെ വിവിധ ആശുപത്രികളിലെ മെഡിക്കല്‍ ഓഫീസര്‍മാര്‍, ആയുര്‍വേദ വകുപ്പ് ജീവനക്കാര്‍ എന്നിവര്‍ പങ്കെടുത്തു.
