മൂന്നാര്: വരയാടുകളുടെ പ്രജനന കാലവുമായി ബന്ധപ്പെട്ട് രണ്ട് മാസങ്ങള്ക്ക് മുമ്പ് അടച്ച ഇരവികുളം ദേശിയോദ്യാനം വീണ്ടും സന്ദര്ശകര്ക്കായി തുറക്കുകയാണ്. ഏപ്രില് 1 മുതല് ഉദ്യാനത്തില് സന്ദര്ശകരെ പ്രവേശിപ്പിച്ച് തുടങ്ങും. രാവിലെ 8 മുതല് വൈകിട്ട് 4വരെയാണ് സന്ദര്ശകര്ക്കുള്ള പ്രവേശന സമയം. ജനുവരി 31 മുതലായിരുന്നു ഉദ്യാനം അടച്ചത്. പുതുതായി പിറക്കുന്ന കുഞ്ഞുങ്ങളുടെ സുരക്ഷ ഉറപ്പുവരുത്തുന്നതോടൊപ്പം വരയാടുകളുടെ പ്രജനനം സുഗമമായി നടക്കുന്നതിനുമായിട്ടാണ് എല്ലാ വര്ഷവും ഈ കാലയളവില് പാര്ക്ക് അടച്ചിടുന്നത്.
ഉദ്യാനം തുറന്ന ശേഷം വരയാടുകളുടെ കണക്കെടുപ്പും നടക്കും. കണക്കെടുപ്പ് പൂര്ത്തിയാകുന്ന മുറക്ക് മാത്രമേ പുതിയതായി പിറന്ന വരയാടിന് കുഞ്ഞുങ്ങളുടെ എണ്ണം സംബന്ധിച്ച ക്യത്യമായ വിവരങ്ങള് ലഭിക്കുകയുള്ളു. ഏതാനും ദിവസങ്ങള് കൂടി കഴിയുന്നതോടെ മധ്യവേനലവധി ആരംഭിക്കും. ഓരോ മധ്യവേനലവധികാലത്തും വരയാടുകളെ കാണുന്നതിനും ഉദ്യാനത്തിന്റെ ഭംഗിയാസ്വദിക്കുന്നതിനുമായി നൂറുകണക്കിന് സഞ്ചാരികളാണ് ദിവസവും മൂന്നാറിലേക്കെത്തുന്നത്.
