മൂന്നാര്‍: ദേവികുളം ബ്ലോക്ക് പഞ്ചായത്ത് വൈസ് പ്രസിഡന്റായി സിപിഐയിലെ എം നാരായണന്‍ എതിരില്ലാതെ തിരഞ്ഞെടുക്കപ്പെട്ടു. എല്‍ഡിഎഫ് ധാരണ പ്രകാരം മുന്‍ വൈസ് പ്രസിഡന്റ് രാജിവച്ചതിനെ തുടര്‍ന്നാണ് തിരഞ്ഞെടുപ്പു നടന്നത്.തിരഞ്ഞെടുപ്പില്‍ യു ഡി എഫ് സ്ഥാനാര്‍ഥിയെ നിര്‍ത്താതെ വന്നതോടെയാണ് നാരായണന്‍ എതിരില്ലാതെ തിരഞ്ഞെടുക്കപ്പെട്ടത്. ദേവികുളം ബ്ലോക്ക് വാര്‍ഡില്‍ നിന്നുള്ള അംഗമാണ് നാരായണന്‍.
13 അംഗ ബ്ലോക്കില്‍ എല്‍ഡിഎഫിന് 8 അംഗങ്ങളുടെ പിന്തുണയാണുള്ളത്. എല്‍ഡിഎഫ് ധാരണ പ്രകാരം ദേവികുളം പഞ്ചായത്ത് വൈസ്പ്രസിഡന്റ് സ്ഥാനം രാജിവച്ചതിനെ തുടര്‍ന്ന് നാളെ വൈസ് പ്രസിഡന്റ് തിരഞ്ഞെടുപ്പ് നടക്കും.
സിപിഐക്ക് സ്ഥാനം നല്‍കാനാണ് സിപിഎം പ്രതിനിധി രണ്ടാഴ്ച്ച മുന്‍പ് രാജിവച്ചത്. 18 അംഗ ദേവികുളം പഞ്ചായത്തില്‍ സിപിഐ 8, സിപിഎം 4, കോണ്‍ഗ്രസ് 6 എന്നിങ്ങനെയാണ് കക്ഷിനില.
