അടിമാലി: വിദ്യാലയങ്ങള്‍ അടച്ച് മധ്യവേനല്‍ അവധിയാരംഭിച്ചതോടെ മൂന്നാര്‍ ഉള്‍പ്പെടുന്ന വിനോദ സഞ്ചാര കേന്ദ്രങ്ങള്‍ വീണ്ടും സഞ്ചാരികളാല്‍ സജീവമായി. അയല്‍ ജില്ലകളില്‍ നിന്നുള്ള വിനോദ സഞ്ചാരികള്‍ക്ക് പുറമെ കേരളത്തിന് പുറത്തു നിന്നും സഞ്ചാരികള്‍ ധാരാളമായി ഹൈറേഞ്ചിലേക്കെത്തുന്നുണ്ട്. പകല്‍ ചൂട് ഉണ്ടെങ്കിലും രാത്രി കാലങ്ങളിലും പുലര്‍ച്ചെയുമുള്ള തണുപ്പ് ഹൈറേഞ്ചിനെ സഞ്ചാരികളുടെ ഇഷ്ട കേന്ദ്രമാക്കുന്നു. വേനല്‍ മഴ പെയ്തതോടെ മലയോരം വീണ്ടും പച്ചപ്പ് വീണ്ട് എടുത്തിട്ടുണ്ട്. ഇതും സഞ്ചാരികളെ ഇടുക്കിയിലേക്കാകര്‍ഷിക്കുന്നു.
ചെങ്കുളവും മാട്ടുപ്പെട്ടിയുമടക്കമുള്ള ബോട്ടിംഗ് സെന്ററുകളില്‍ തിരക്ക് വര്‍ധിച്ചിട്ടുണ്ട്. ഇരവികുളം ദേശിയോദ്യാനത്തിലേക്കടക്കം സഞ്ചാരികള്‍ കൂടുതലായി എത്തി തുടങ്ങി. കഴിഞ്ഞ രണ്ട് മാസക്കാലം വിനോദ സഞ്ചാര കേന്ദ്രങ്ങളില്‍ കാര്യമായ തിരക്കനുഭവപ്പെട്ടിരുന്നില്ല. സഞ്ചാരികളുടെ തിരക്ക് രണ്ട് മാസക്കാലത്തേക്ക് തുടര്‍ന്നേക്കുമെന്നാണ് പ്രതീക്ഷ. വിനോദ സഞ്ചാര മേഖലയുമായി ബന്ധപ്പെട്ട് നില്‍ക്കുന്ന വ്യാപാരികളും ഹോംസ്റ്റേ, റിസോര്‍ട്ട് നടത്തിപ്പുകാരും സഞ്ചാരികളുടെ തിരക്കേറുന്നതിനെ പ്രതിക്ഷയോടെ നോക്കി കാണുന്നു.
