അടിമാലി: ഏറെ വര്‍ഷത്തെ ഇടവേളക്ക് ശേഷമാണ് വീണ്ടും അടിമാലി ഫെസ്റ്റ് നടക്കാനൊരുങ്ങുന്നത്. അടുത്തമാസം 1 മുതല്‍ 11 വരെയാണ് ഫെസ്റ്റ് നടക്കുക.ഫെസ്റ്റ് നടത്തിപ്പുമായി ബന്ധപ്പെട്ട ഒരുക്കങ്ങള്‍ പുരോഗമിക്കുകയാണ്.ഇതിന്റെ ഭാഗമായിട്ടാണ് ഫെസ്റ്റിന്റെ ലോഗോ തയ്യാറാക്കാന്‍ പൊതുജനങ്ങള്‍ക്ക് സംഘാടകര്‍ അവസരമൊരുക്കിയിരിക്കുന്നത്.തിരഞ്ഞെടുക്കപ്പെടുന്ന മികച്ച ലോഗോക്ക് സമ്മാനവും പ്രഖ്യാപിച്ചിട്ടുണ്ട്.ഈ മാസം 14ആണ് ലോഗോ സമര്‍പ്പിക്കേണ്ട അവസാന ദിവസം. കഴിഞ്ഞ ഡിസംബറില്‍ ഫെസ്റ്റ് നടത്താന്‍ തീരുമാനം കൈകൊണ്ടിരുന്നുവെങ്കിലും ഫെസ്റ്റ് നഗരിയുമായി ബന്ധപ്പെട്ടുണ്ടായ സാങ്കേതിക തടസ്സത്താല്‍ ഫെസ്റ്റ് നടത്തിപ്പ് നീളുകയായിരുന്നു.വില്‍പ്പന, പ്രദര്‍ശന സ്റ്റാളുകള്‍ ഉള്‍പ്പെടെ ഒരുക്കി കലാപരിപാടികളോടെ വിപുലമായ രീതിയില്‍ ഫെസ്റ്റ് നടത്തുവാനാണ് തീരുമാനം കൈകൊണ്ടിട്ടുള്ളത്. മുന്‍കാലങ്ങളില്‍ നടന്നിരുന്ന അടിമാലി ഫെസ്റ്റ് അടിമാലിയുടെ വാണിജ്യമേഖലക്കുള്‍പ്പെടെ ഉണര്‍വ്വ് പകര്‍ന്നിരുന്നു.പിന്നീട് കഴിഞ്ഞ കുറേ വര്‍ഷങ്ങളായി ഫെസ്റ്റ് നടന്നിരുന്നില്ല.1992ലാണ് വിവിധ സാംസ്‌ക്കാരിക സംഘടനകള്‍ മുന്‍കൈയ്യെടുത്ത് ഫെസ്റ്റിന് തുടക്കം കുറിച്ചത്.2016ലാണ് ഒടുവില്‍ അടിമാലി ഫെസ്റ്റ് നടന്നത്.അടിമാലി സര്‍ക്കാര്‍ ഹൈസ്‌ക്കൂള്‍ ഗ്രൗണ്ട് കേന്ദ്രീകരിച്ചാണ് ഫെസ്റ്റ് നടത്തുന്നത്.
