മലയാളികൾ ഉൾപ്പെടെയുള്ള ഇന്ത്യക്കാരുടെ സുരക്ഷ ഉറപ്പാക്കണം’; പ്രധാനമന്ത്രിക്ക് കത്തയച്ച് വി ഡി സതീശൻ

പശ്ചിമേഷ്യൻ രാജ്യങ്ങളിൽ യുദ്ധഭീതി നിലനിൽക്കുന്ന പശ്ചാത്തലത്തിൽ മലയാളികൾ ഉൾപ്പെടെയുള്ള ഇന്ത്യക്കാരുടെ സുരക്ഷ ഉറപ്പാക്കണമെന്ന് ആവശ്യപ്പെട്ട് പ്രതിപക്ഷ നേതാവ് വി.ഡി സതീശൻ പ്രധാനമന്ത്രിക്ക് കത്തയച്ചു. ആശയവിനിമയം ബുദ്ധിമുട്ടാകുകയും അസ്ഥിരതയെക്കുറിച്ചുള്ള റിപ്പോർട്ടുകൾ പുറത്തുവരികയും ചെയ്യുന്നതിനാൽ കേരളത്തിലെ ആയിരക്കണക്കിന് കുടുംബങ്ങൾ കടുത്ത ഉത്കണ്ഠയിലാണ് കഴിയുന്നത്.

പതിറ്റാണ്ടുകളായി, മിഡിൽ ഈസ്റ്റിൽ ജോലി ചെയ്യുന്ന കേരളീയർ നമ്മുടെ രാജ്യത്തിന്റെ സമ്പദ്‌വ്യവസ്ഥയ്ക്ക് വളരെയധികം സംഭാവനകൾ നൽകുകയും തങ്ങളുടെ കഠിനാധ്വാനത്തിലൂടെയും സമർപ്പണത്തിലൂടെയും ഇന്ത്യയുടെ പ്രശസ്തി ഉയർത്തിപ്പിടിക്കുകയും ചെയ്തിട്ടുണ്ട്. സ്ഥിതിഗതികൾ സൂക്ഷ്മമായി നിരീക്ഷിക്കുന്നതിനും, ദുരിതബാധിത രാജ്യങ്ങളിലെ ഇന്ത്യൻ എംബസികളും കോൺസുലേറ്റുകളും നമ്മുടെ പൗരന്മാർക്ക് അടിയന്തര സഹായം, വ്യക്തമായ ഉപദേശങ്ങൾ എന്നിവ നൽകുന്നതിന് പൂർണ്ണമായും സജ്ജമാണെന്ന് ഉറപ്പാക്കുന്നതിനും അടിയന്തര ഇടപെടൽ ഞാൻ വിനീതമായി അഭ്യർത്ഥിക്കുന്നുവെന്നും വി ഡി സതീശൻ ആവശ്യപ്പെട്ടു.