അടിമാലി ടൗണ്‍ സൗന്ദര്യവല്‍ക്കരണ പദ്ധതി തുടര്‍ പരിപാലനമില്ലാതെ നശിക്കുന്നു
അടിമാലി: അടിമാലി ഗ്രാമപഞ്ചായത്ത് നടപ്പിലാക്കിയ അടിമാലി ടൗണ്‍ സൗന്ദര്യവല്‍ക്കരണ പദ്ധതി തുടര്‍ പരിപാലനമില്ലാതെ നശിക്കുന്നു.
രാത്രികാലത്ത് അടിമാലി ടൗണിനെയാകെ പ്രകാശപൂരിതമാക്കാനും ടൗണിനെ കൂടുതല്‍ വൃത്തിയുള്ളതാക്കാനും ലക്ഷ്യമിട്ടായിരുന്നു പഞ്ചായത്തിന്റെ നേതൃത്വത്തില്‍ ടൗണ്‍ സൗന്ദര്യവല്‍ക്കരണ പദ്ധതി നടപ്പിലാക്കിയത്. അഡ്വ. എ രാജ എംഎല്‍എ ഉദ്ഘാടനം നിര്‍വ്വഹിച്ചായിരുന്നു പദ്ധതിക്ക് തുടക്കം കുറിച്ചത്. എന്നാല്‍ പദ്ധതി യാഥാര്‍ത്ഥ്യമായി വര്‍ഷങ്ങള്‍ പിന്നിട്ടതോടെ പദ്ധതിക്ക് വേണ്ടുന്ന തുടര്‍ പരിപാലനം ലഭ്യമാക്കുന്നില്ലെന്നാണ് പരാതി .പരിപാലനം ഇല്ലാതായതോടെ പദ്ധതിയുടെ ഭാഗമായി സ്ഥാപിച്ച പൂച്ചെടികള്‍ പൂര്‍ണ്ണമായി നശിച്ചു.
ടൗണിനെ പ്രകാശ പൂരിതമാക്കാന്‍ സ്ഥാപിച്ച ലൈറ്റുകളുടെ തുടര്‍ അറ്റകുറ്റപ്പണികളുടെ കാര്യത്തില്‍ ശ്രദ്ധ ചെലുത്താതായതോടെ അവയും ഏറെക്കുറെ നാശത്തിന്റെ വക്കിലാണ്. ടൗണിന്റെ വിവിധ ഇടങ്ങളില്‍ വഴി വിളക്കുകള്‍ സ്ഥാപിക്കുകയും വിളക്കുകള്‍ സ്ഥാപിക്കാന്‍ ഉപയോഗിച്ചിട്ടുള്ള തൂണുകളില്‍ അലങ്കാരച്ചെടികളും വെയിസ്റ്റ് ബോക്സും ഘടിപ്പിച്ചായിരുന്നു പദ്ധതി വിഭാവനം ചെയ്തത്. ടൗണിന്റെ വിവിധ ഭാഗങ്ങളില്‍ 84ഓളം വഴിവിളക്കുകളും അജൈവ മാലിന്യങ്ങള്‍ നിക്ഷേപിക്കുവാന്‍ വെയിസ്റ്റ് ബോക്സുകളുമാണ് സ്ഥാപിച്ചിട്ടുള്ളത്.
സോളാര്‍ എനര്‍ജിയിലൂടെയാണ് ലൈറ്റുകളുടെ പ്രവര്‍ത്തനം .രാത്രികാലത്ത് വൈദ്യുതി തടസ്സമുണ്ടായാലും ടൗണിനെ പ്രകാശപൂരിതമാക്കാനിത് സഹായിക്കും .ഈ പദ്ധതിയാണിപ്പോള്‍ തുടര്‍ പരിപാലനത്തിന്റെ അഭാവം മൂലം നാശത്തിന്റെ വക്കില്‍ എത്തിയിട്ടുള്ളത്. പദ്ധതി നാമാവശേഷമായാല്‍ വലിയ നഷ്ടം സംഭവിക്കുമെന്നതിനാല്‍ പദ്ധതിയുടെ തുടര്‍ പരിപാലനം സാധ്യമാക്കണമെന്നാണ് ആവശ്യം.
