മൂന്നാറില്‍ മില്‍മയുടെ ഭൂമി ഏറ്റെടുക്കാനുള്ള കേരള ലൈവ് സ്റ്റോക്ക് ബോര്‍ഡിന്റെ നടപടിയില്‍ പ്രതിഷേധം
മൂന്നാര്‍: മൂന്നാറില്‍ പ്രവര്‍ത്തിക്കുന്ന മില്‍മയുടെ ശീതീകരണ പ്ലാന്റ് ഉള്‍പ്പെടെയുള്ള സംവിധാനങ്ങള്‍ സ്ഥിതി ചെയ്യുന്ന ഭൂമി ഏറ്റെടുക്കാനുള്ള കേരള ലൈവ് സ്റ്റോക്ക് ബോര്‍ഡിന്റെ നടപടിയില്‍ പ്രതിഷേധം. ഇക്കാ നഗറില്‍ 2 ഏക്കര്‍ ഭൂമിയിലാണ് മില്‍മയുടെ കേന്ദ്രം പ്രവര്‍ത്തിക്കുന്നത്. മില്‍മയുടെ ഉത്പന്നങ്ങള്‍ വിറ്റഴിക്കുന്ന മാര്‍ക്കറ്റിങ് ഹബ്, സംസ്ഥാനത്തെ വിവിധ ക്ഷീര സംഘം പ്രസിഡന്റുമാര്‍, സെക്രട്ടറിമാര്‍ തുടങ്ങിയവര്‍ക്കുള്ള പരിശീലന കേന്ദ്രം തുടങ്ങിയ സംവിധാനങ്ങള്‍ ഇവിടെ പ്രവര്‍ത്തിക്കുന്നു. രണ്ടു വര്‍ഷം മുമ്പ് കേന്ദ്രത്തിന്റെ നവീകരണ പ്രവര്‍ത്തനങ്ങളും നടത്തി.
മികച്ച നിലയില്‍ പ്രവര്‍ത്തനം നടന്നു വരുന്നതിനിടയിലാണ് ക്ഷീരവികസന വകുപ്പിന്റെ ഉത്തരവ് പ്രകാരം കേരള ലൈവ് സ്റ്റോക്ക് ബോര്‍ഡിന്റെ ഉദ്യോഗസ്ഥര്‍ സ്ഥലത്തെത്തി ഭൂമി ഏറ്റെടുത്ത് ബോര്‍ഡ് സ്ഥാപിച്ചത്. ഭൂമിയിലേക്ക് റോഡ് നിര്‍മ്മിക്കാന്‍ തുടങ്ങിയതോടെ വിവരമറിഞ്ഞ് സ്ഥലത്തെത്തിയ മില്‍മ അധികൃതരും ക്ഷീരകര്‍ഷകരും ഇത് തടഞ്ഞു. തുടര്‍ന്ന് പൊലീസ് എത്തിയാണ് ഇരുകൂട്ടരെയും പിരിച്ചുവിട്ടത്. മില്‍മ എറണാകുളം മേഖല യൂണിയന്‍, ക്ഷീരകര്‍ഷകര്‍ എന്നിവരുടെ നേതൃത്വത്തില്‍ ഭൂമി ഏറ്റെടുക്കല്‍ നീക്കത്തിനെതിരെ ഇക്കാ നഗറിലെ ഭൂമിയില്‍ ധര്‍ണ നടത്തി.
കേരള ലൈവ് സ്റ്റോക്ക് ബോര്‍ഡ് ഏകപക്ഷീയമായി തീരുമാനമെടുക്കുന്നുവെന്നാണ് പ്രതിഷേധക്കാരുടെ ആരോപണം. എന്നാല്‍ സര്‍ക്കാരിന്റെ ഉത്തരവു പ്രകാരം പരിശീലന കേന്ദ്രം ഉള്‍പ്പെടെയുളളവ മില്‍മയില്‍ നിലനിര്‍ത്തി കൊണ്ട് ശേഷിച്ച ഭൂമിയാണ് ഏറ്റെടുക്കുന്നതെന്നാണ് കേരള ലൈവ് സ്റ്റോക്ക് ബോര്‍ഡിന്റെ വിശദീകരണം. പ്രശ്‌നത്തിന് പരിഹാരം കണ്ടില്ലെങ്കില്‍ വരും ദിവസങ്ങളില്‍ ഇരു വിഭാഗവും തമ്മിലുള്ള സ്ഥല തര്‍ക്കം രൂക്ഷമാകും
