അടിമാലി ശാന്തഗിരി ശ്രീ മഹേശ്വര ക്ഷേത്രത്തില് ശിവരാത്രി മഹോത്സവം ഈ മാസം 7 മുതല് 16 വരെ നടക്കും
അടിമാലി: അടിമാലി ശാന്തഗിരി ശ്രീ മഹേശ്വര ക്ഷേത്രത്തില് ശിവരാത്രി മഹോത്സവം ഈ മാസം 7 മുതല് 16 വരെ നടക്കും. ഏഴിന് വൈകിട്ട് 7.10 നും 8.20നും ഇടയിലുള്ള ശുഭ മുഹൂര്ത്തത്തില് ക്ഷേത്രം തന്ത്രി പൂത്തോട്ട ലാലന് തന്ത്രിയുടെയും ക്ഷേത്രം മേല്ശാന്തി മഠത്തുംമുറി അജിത് ശാന്തിയുടെയും മുഖ്യകാര്മ്മികത്വത്തില് ഉത്സവത്തിന് കൊടി ഉയരും. ഉത്സവ ദിവസങ്ങളില് പതിവ് പൂജകള്ക്ക് പുറമെ പ്രത്യേക പൂജകളും വഴിപാടുകളും നടക്കും.
ഉത്സവത്തിന്റെ രണ്ടാം ദിനം രാവിലെ നവകം, പഞ്ചഗവ്യം, അഭിഷേകം എന്നിവക്ക് ശേഷം ഉത്സവബലി ദര്ശനം നടക്കും. വൈകിട്ട് ദീപാരാധനയും ഭഗവതി സേവയും ലളിതസഹസ്രനാമാര്ച്ചനയും നടക്കും.മൂന്നാം ദിനം രാവിലെ കൂട്ടമൃത്യജ്ഞയ ഹോമം നടക്കും. ആറാം ദിനം വൈകിട്ട് 5ന് അഭിഷേക കാവടി നടക്കും.ഏഴാം ദിനം രാവിലെ മഹാവിദ്യാരാജ്ഞി പൂജയും വൈകിട്ട് താലപ്പൊലി ഘോഷയാത്രയും തുടര്ന്ന് ദീപാരാധനയും നടക്കും.
എട്ടാം ദിനം പള്ളി വേട്ട മഹോത്സവം നടക്കും. വൈകിട്ട് ദീപാരാധന, പുഷ്പാഭിഷേകം സേവ എന്നിവക്ക് ശേഷം രാത്രി 9.30നാണ് പള്ളിവേട്ട പുറപ്പാട്. ഒമ്പതാം ദിവസം മഹാശിവരാത്രി ആറാട്ട് മഹോത്സവവും പത്താം ദിനം പിതൃപൂജകളും പിതൃതര്പ്പണവും നടക്കും.ഉത്സവ നടത്തിപ്പിനുള്ള ഒരുക്കങ്ങള് പൂര്ത്തിയായി വരുന്നുവെന്ന് ക്ഷേത്രം ഭാരവാഹികള് പറഞ്ഞു.ഉത്സവാഘോഷത്തിന്റെ ഭാഗമായി ക്ഷേത്രത്തില് എല്ലാ ദിവസവും മഹാഅന്നദാനം ക്രമീകരിച്ചിട്ടുണ്ട്.
ഉത്സവത്തിന്റെ വിവിധ ദിവസങ്ങളില് ഗാനമേളയടക്കം വിവിധ കലാപരിപാടികളും ഒരുക്കിയിട്ടുള്ളതായി ശാഖാ പ്രസിഡന്റ് അഡ്വ.നൈജു രവീന്ദ്രനാഥ്, സെക്രട്ടറി ബാബു കൃഷ്ണന്കുട്ടി, വൈസ് പ്രസിഡന്റ് ഡോ. രേഖ ബാബു, പബ്ലിസിറ്റി ചെയര്മാന് സന്തോഷ് മാധവന് തുടങ്ങിയവര് അറിയിച്ചു.
