മൂന്നാര്‍: റോഡുകളുടെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് വട്ടവട ഗ്രാമപഞ്ചായത്തില്‍ കോണ്‍ഗ്രസ് ആഹ്വാനം ചെയ്ത ഹര്‍ത്താല്‍ പൂര്‍ണ്ണം. അതിര്‍ത്തി ഗ്രാമമായ വട്ടവടയില്‍ തകര്‍ന്ന് കിടക്കുന്ന റോഡുകളുടെ ടാറിംഗ് ജോലികള്‍ നടത്തണമെന്ന ആവശ്യം കഴിഞ്ഞ കുറെക്കാലങ്ങളായി നിലനില്‍ക്കുന്നതാണ്. നിര്‍മ്മാണം സംബന്ധിച്ച് ഇടക്കിടെ പ്രഖ്യാപനങ്ങള്‍ ഉണ്ടാകാറുണ്ടെങ്കിലും മുന്നോട്ട് പോക്കുണ്ടായിട്ടില്ലെന്നാണ് ആക്ഷേപം. ഈ സാഹചര്യത്തിലാണ് റോഡുകളുടെ ശോചനീയാവസ്ഥ പരിഹരിക്കണമെന്ന ആവശ്യമുന്നയിച്ച് കോണ്‍ഗ്രസ് ഇന്ന് വട്ടവടയില്‍ ഹര്‍ത്താലിനാഹ്വാനം ചെയ്തത്. രാവിലെ 6 മുതല്‍ വൈകിട്ട് 5വരെയായിരുന്നു ഹര്‍ത്താല്‍. അവശ്യ സര്‍വ്വീസുകളെ ഹര്‍ത്താലില്‍ നിന്നും ഒഴിവാക്കിയിരുന്നു. കടകമ്പോളങ്ങള്‍ പൂര്‍ണ്ണമായി അടഞ്ഞ് കിടന്നു. പഞ്ചായത്ത് പരിധിയിലെ ഗതാഗതവും സ്തംഭിച്ചു. വിനോദ സഞ്ചാര മേഖലയും നിശ്ചലമായി. ഹര്‍ത്താലനുകൂലികള്‍ റോഡില്‍ കൊടിയും മറ്റു സാധന സാമഗ്രികളും നിരത്തി ഗതാഗതം തടഞ്ഞു. മറ്റനിഷ്ട സംഭവങ്ങള്‍ റിപ്പോര്‍ട്ട് ചെയ്തില്ല. വട്ടവട പഞ്ചായത്ത് പരിധിയില്‍ വരുന്ന ഒട്ടു മിക്ക ഇടങ്ങളിലേക്കുള്ള റോഡുകളും നിര്‍മ്മാണം കാത്ത് കിടക്കുകയാണ്. റോഡുകള്‍ തകര്‍ന്നതോടെ ആശുപത്രിയിലേക്കും സ്‌കൂളിലേക്കും മറ്റിതര ആവശ്യങ്ങള്‍ക്കുമൊക്കെയുള്ള യാത്ര അതീവ ദുഷ്‌ക്കരമായി കഴിഞ്ഞു. തകര്‍ന്ന് കിടക്കുന്ന റോഡുകള്‍ വട്ടവടയുടെ കാര്‍ഷിക മേഖലക്കും വിനോദ സഞ്ചാര മേഖലക്കും വലിയ തിരിച്ചടി സമ്മാനിക്കുന്നുണ്ട്. റോഡ് നിര്‍മ്മാണം ഇനിയും സാധ്യമാക്കിയില്ലെങ്കില്‍ ഹര്‍ത്താലിന് ശേഷം ശക്തമായ തുടര്‍ പ്രതിഷേധ പരിപാടികളുമായി മുമ്പോട്ട് പോകാനാണ് കോണ്‍ഗ്രസ് പ്രാദേശിക നേതൃത്വത്തിന്റെ തീരുമാനം.
