അടിമാലി: അടിമാലി താലൂക്കാശുപത്രിയില്‍ രോഗിക്ക് എലിയുടെ കടിയേറ്റതായി പരാതി. സര്‍ജ്ജറിക്ക് ശേഷം ആശുപത്രിയിലെ പേ വാര്‍ഡില്‍ ചികിത്സയില്‍ തുടര്‍ന്നിരുന്ന കമ്പിളികണ്ടം സ്വദേശി ഷാജനാണ് ഇന്ന് പുലര്‍ച്ചെ എലിയുടെ കടിയേറ്റത്. ഡയബറ്റിക് രോഗിയായ ഷാജന് കഴിഞ്ഞ 28നായിരുന്നു കാലിലെ സര്‍ജറിക്കായി താലൂക്കാശുപത്രിയില്‍ ചികിത്സ തേടിയത്. കഴിഞ്ഞ ദിവസം സര്‍ജ്ജറി കഴിയുകയും ചെയ്തു.
ആശുപത്രിയിലെ പേ വാര്‍ഡിലായിരുന്നു ഷാജന് തുടര്‍ ചികിത്സക്കായി കഴിഞ്ഞ വന്നിരുന്നത്. കട്ടിലില്‍ കിടക്കുന്നതിനിടെ ഇന്ന് പുലര്‍ച്ചെ കാലില്‍ എലിയുടെ കടിയേറ്റതായി ഷാജന് പറഞ്ഞു. മുറിയില്‍ ഷാജന് കിടക്കുന്ന ഭാഗത്ത് ജനാല അടക്കുവാനുള്ള പാളികള്‍ ഇല്ല. കാഡ് ബോഡ് കഷണങ്ങളും മറ്റും ഉപയോഗിച്ചാണ് ഈ ഭാഗം മറച്ചിട്ടുള്ളത്. ഇതു വഴി ഇഴജന്തുക്കളടക്കം അകത്ത് പ്രവേശിക്കാനുള്ള സാധ്യത തള്ളിക്കളയാനാകില്ല.
ഷാജന്റെ ഇരു കാലുകളിലും കാല്‍വിരലിന്റെ അഗ്രഭാഗത്ത് കടിയേറ്റതിന്റെ പാടുകള്‍ കാണാം. ഇതുമായി ബന്ധപ്പെട്ട് ഷാജന് ചികിത്സ ലഭ്യമാക്കിയതായും തുറന്നു കിടന്നിരുന്ന ജനല്‍ ഭാഗം അടക്കാന്‍ നിര്‍ദ്ദേശം നല്‍കിയതായും ആശുപത്രി അധികൃതര്‍ പറഞ്ഞു .അതേ സമയം ആശുപത്രിയില്‍ വച്ച് രോഗിക്ക് എലിയുടെ കടിയേറ്റതില്‍ വലിയ പ്രതിഷേധവും ഉയര്‍ന്നിട്ടുണ്ട്
