ബി എസ് എന്‍ എല്‍ മൊബൈല്‍ നെറ്റ് വര്‍ക്കിന്റെ സേവനം കാര്യക്ഷമമാക്കണമെന്നാവശ്യം
അടിമാലി: ദേവികുളം താലൂക്ക് പരിധിയില്‍ ബി എസ് എന്‍ എല്‍ മൊബൈല്‍ നെറ്റ് വര്‍ക്കിന്റെ സേവനം കാര്യക്ഷമമാക്കണമെന്നാവശ്യം. ദേവികുളം താലൂക്കിന്റെ വിവിധയിടങ്ങളില്‍ ബി എസ് എന്‍ എല്‍ മൊബൈല്‍ നെറ്റ് വര്‍ക്കിന്റെ സേവനം മെച്ചപ്പെടുത്താനുള്ള പ്രവര്‍ത്തനങ്ങള്‍ മുമ്പോട്ട് പോകുന്നുവെന്ന് പറയുമ്പോഴും നെറ്റ് വര്‍ക്കിന്റെ ലഭ്യത കുറവ് മൂലം പ്രതിസന്ധി അനുഭവിക്കുകയാണ് ഉപഭോക്താക്കള്‍. തോട്ടം മേഖലയിലും ആദിവാസി ഇടങ്ങളിലും മാത്രമല്ല നഗര മേഖലയില്‍ പോലും നെറ്റ് വര്‍ക്ക് വേണ്ടവിധം ലഭ്യമാകുന്നില്ലെന്നാണ് പരാതി. വിദൂര ഇടങ്ങളില്‍ ബി എസ് എന്‍ എല്‍ മൊബൈല്‍ നൈറ്റ് വര്‍ക്ക് മാത്രം ലഭിക്കുന്ന പ്രദേശം ധാരാളമുണ്ട്. ഇവിടങ്ങളില്‍ ആശയ വിനിമയം മാത്രമല്ല ആളുകളുടെ ഓണ്‍ലൈന്‍ ഇടപാടുകള്‍ക്കും നെറ്റ് വര്‍ക്കിന്റെ കുറവ് പ്രതിസന്ധിയാകുകയാണ്. നെറ്റ് വര്‍ക്ക് സംവിധാനം തീരെയില്ലാത്ത ഇടങ്ങളില്‍ പുതിയതായി ബി എസ് എന്‍ എല്‍ ടവറുകള്‍ സ്ഥാപിച്ചിരുന്നു. ഈ ടവറുകള്‍ പലതും ഇനിയും വേണ്ടവിധം പ്രവര്‍ത്തനക്ഷമമായിട്ടില്ല. നിലവിലുള്ള ടവറുകള്‍ അപ്‌ഡേറ്റ് ചെയ്യുമെന്ന പ്രഖ്യാപനവുമുണ്ടായി. എന്നിട്ടും നെറ്റ് വര്‍ക്ക് ലഭ്യത കാര്യക്ഷമമായിട്ടില്ല.
ചില ഇടങ്ങളില്‍ ബി എസ് എന്‍ എല്‍ നെറ്റ് വര്‍ക്കില്‍ വിളിച്ചാല്‍ പോലും കിട്ടാത്ത സ്ഥിതിയുണ്ട്. ബി എസ് എന്‍ എല്‍ നെറ്റ് കാര്യക്ഷമമാക്കാന്‍ സ്വീകരിച്ച് വരുന്ന നടപടികള്‍ വേഗത്തില്‍ പൂര്‍ത്തീകരിച്ച് വിഷയത്തില്‍ പ്രശ്‌ന പരിഹാരം കാണണമെന്നാണ് ആവശ്യം.
