മൂന്നാര്‍: മൂന്നാര്‍ ഗ്രാമപഞ്ചായത്തിന്റെ നല്ലതണ്ണി കല്ലാറില്‍ പ്രവര്‍ത്തിക്കുന്ന മാലിന്യ സംസ്‌ക്കരണ കേന്ദ്രത്തിന് ചുറ്റും കാട്ടുമൃഗങ്ങള്‍ പ്രവേശിക്കാതെ പ്രതിരോധ വേലി നിര്‍മ്മിക്കണമെന്നാവശ്യം.മാലിന്യം തരംതിരിക്കുന്നതും സംസ്‌ക്കരണവുമൊക്കെ നടക്കുന്നത് ഈ കേന്ദ്രത്തിലാണ്. നിരവധി തൊഴിലാളികളും ഇവിടെ പണിയെടുക്കുന്നു. കേന്ദ്രത്തിന് പുറത്ത് പരിസരപ്രദേശങ്ങളിലായി പ്ലാസ്റ്റിക് മാലിന്യമടക്കം കൂടി കിടപ്പുണ്ട്.ഈ ഭാഗങ്ങളിലേക്ക് തീറ്റ തേടി കാട്ടാനകളടക്കം എത്താറുമുണ്ട്. പകല്‍ സമയത്ത് പോലും കാട്ടാനകളുടെ സാന്നിധ്യം ഭയന്ന് വേണം തൊഴിലാളികളിവിടെ പണിയെടുക്കുവാന്‍. മുമ്പിവിടെ കാട്ടാന ആക്രമണത്തില്‍ ഒരാള്‍ക്ക് പരിക്കേറ്റിരുന്നു.മാലിന്യങ്ങള്‍ക്കിടയില്‍ തീറ്റ തേടുന്ന കാട്ടാനകളും മറ്റും പ്ലാസ്റ്റിക് അവശിഷ്ടങ്ങള്‍ ഭക്ഷിക്കാനുള്ള സാധ്യതയുണ്ടെന്നും വാദമുയരുന്നു. ഈ സാഹചര്യത്തിലാണ് മാലിന്യ സംസ്‌ക്കരണ കേന്ദ്രത്തിന് ചുറ്റും കാട്ടുമൃഗങ്ങള്‍ പ്രവേശിക്കാതെ പ്രതിരോധ വേലി നിര്‍മ്മിക്കണമെന്ന ആവശ്യം ഉയര്‍ന്നിട്ടുള്ളത്. മാലിന്യ സംസ്‌ക്കരണ കേന്ദ്രത്തിന് സമീപത്തെത്തുന്ന കാട്ടാനകളെ പലപ്പോഴും പടക്കം പൊട്ടിച്ചാണ് തുരത്താറ്. അവശിഷ്ടങ്ങള്‍ക്കിടയിലെ ഭക്ഷണ ലഭ്യതയാണ് മൃഗങ്ങളെ ഇവിടേക്കാകര്‍ഷിക്കുന്നത്. മാലിന്യ സംസ്‌ക്കരണ കേന്ദ്രത്തിന് ചുറ്റും പ്രതിരോധ വേലി സജ്ജമാക്കണമെന്ന നിര്‍ദ്ദേശം മുമ്പ് വനംവകുപ്പും മുമ്പോട്ട് വച്ചിരുന്നു.
