റ്റീ കമ്പനിയില്‍ മൃഗാശുപത്രിക്ക് സമീപമുള്ള മാലിന്യ കൂമ്പാരം ; പ്രദേശവാസികള്‍ക്ക് തലവേദനയാകുന്നു
അടിമാലി: ബൈസണ്‍വാലി പഞ്ചായത്തിലെ റ്റീ കമ്പനിയില്‍ മൃഗാശുപത്രിക്ക് സമീപം കൂട്ടിയിട്ടിരിക്കുന്ന പ്ലാസ്റ്റിക്ക് അടക്കമുള്ള മാലിന്യം പ്രദേശവാസികള്‍ക്ക് തലവേദനയാകുന്നു.ചെറിയ തോതില്‍ മാലിന്യം ശേഖരിച്ച് ശേഖരിച്ച് ഇപ്പോള്‍ മാലിന്യത്തിന്റെ അളവ് വലിയ തോതില്‍ ആയിട്ടുണ്ട്. മാലിന്യം നീക്കം ചെയ്യണമെന്ന സമീപവാസികളുടെ ആവശ്യത്തോട് പഞ്ചായത്ത് മുഖം തിരിക്കുന്നുവെന്നാണ് ആക്ഷേപം. ഈ മേഖലയില്‍ നിരവധിയായ കുടുംബങ്ങള്‍ താമസക്കാരായി ഉണ്ട്. ഇടക്ക് മാലിന്യക്കൂനയില്‍ തീപടര്‍ന്നതായും രൂക്ഷമായ പുകയും ദുര്‍ഗന്ധവും പടര്‍ന്നതോടെ കുഞ്ഞുകുട്ടികളടക്കം വീടുകളില്‍ പ്രയാസം അനുഭവിച്ചതായും പരാതി ഉയരുന്നു. വേനല്‍ക്കാലമായതിനാല്‍ ആരെങ്കിലും മാലിന്യത്തില്‍ തീ പടര്‍ത്തിയാല്‍ അത് വലിയ പ്രതിസന്ധിയാകും. മഴ പെയ്യുന്നതോടെ ഈ മാലിന്യം സമീപത്തെ തോട്ടിലേക്ക് ഒഴുകിച്ചാടുന്ന സ്ഥിതിയുണ്ടാകുമെന്നും ആക്ഷേപം ഉണ്ട്. മിനി എം സി എഫ് പ്രദേശത്ത് തുടങ്ങാന്‍ പഞ്ചായത്ത് നീക്കം നടത്തുന്നതായും ആ നീക്കം അനുവദിക്കില്ലെന്നും സമീപവാസികള്‍ പറയുന്നു.പ്രദേശത്ത് നിക്ഷേപിച്ചിട്ടുള്ള മാലിന്യം ജനവാസമില്ലാത്ത ഇടത്തേക്ക് മാറ്റണമെന്നാണ് കുടുംബങ്ങളുടെ ആവശ്യം.
