അടിമാലി താലൂക്ക് ആശുപത്രിയിൽ രണ്ടര വയസുകാരന് ചികിത്സ നിഷേധിച്ചു; ഡോക്ടര്‍ കുഞ്ഞിനെ പരിശോധിക്കാന്‍ കൂട്ടാക്കിയില്ലെന്ന് പരാതി
അടിമാലി: അടിമാലി താലൂക്കാശുപത്രിയിലെ ക്യാഷ്വാലിറ്റി സെക്ഷനിലുണ്ടായിരുന്ന പീഡിയാട്രിക് വിഭാഗത്തിലെ ഡോക്ടര്‍ പനിക്ക് ചികിത്സ തേടിയെത്തിയ കുഞ്ഞിനെ പരിശോധിക്കാന്‍ കൂട്ടാക്കിയില്ലെന്ന് പരാതി. അടിമാലി ബ്ലോക്ക് പഞ്ചായത്തംഗം കെ കൃഷ്ണമൂര്‍ത്തിയാണ് പരാതിയുമായി രംഗത്ത് വന്നത്. രണ്ടര വയസ്സുള്ള തന്റെ കുഞ്ഞിന് പനിയും ചുമയുമായിട്ടാണ് താലൂക്കാശുപത്രിയില്‍ ചികിത്സ തേടിയെത്തിയതെന്ന് കൃഷ്ണമൂര്‍ത്തി പറയുന്നു.
ഒ പി വിഭാഗത്തില്‍ പീഡിയാട്രിക് ഡോക്ടര്‍ ഇല്ലെന്നറിഞ്ഞതോടെ ക്യാഷ്വാലിറ്റി സെക്ഷനില്‍ ഉണ്ടായിരുന്ന പീഡിയാട്രിക് ഡോക്ടറെ കാണിക്കുവാന്‍ കുഞ്ഞുമായി എത്തിയെന്നും ഡോക്ടറുടെ അടുക്കല്‍ എത്തിയെങ്കിലും കുഞ്ഞിനെ പരിശോധിക്കാന്‍ ഡോക്ടര്‍ കൂട്ടാക്കിയില്ലെന്നുമാണ് കൃഷ്ണ മൂര്‍ത്തിയുടെ പരാതി. പീഡിയാട്രിക് ഡോക്ടര്‍ പരിശോധിക്കാതെ വന്നതോടെ കുഞ്ഞിനെ മറ്റൊരു ഡോക്ടറുടെ അടുക്കല്‍ എത്തിച്ച് ചികിത്സ തേടി മടങ്ങിയതായും ഇത് സംബന്ധിച്ച് ജില്ലാ മെഡിക്കല്‍ ഓഫീസര്‍ക്ക് പരാതി നല്‍കുമെന്നും കെ കൃഷ്ണമൂര്‍ത്തി പറഞ്ഞു.
അതേ സമയം വിഷയം ശ്രദ്ധയില്‍പ്പെട്ടതായും ഇത് സംബന്ധിച്ച് ഡോക്ടറോട് വിശദീകരണം തേടിയതായും ആശുപത്രി സൂപ്രണ്ട് പറഞ്ഞു.
