മുതിരപ്പുഴക്കു കുറുകെ പോതമേട് റോഡിനെ ബന്ധിപ്പിക്കുന്ന പാലത്തിന്റെ ജോലികള്‍ പുരോഗമിക്കുന്നു
മൂന്നാര്‍: മൂന്നാര്‍ ഹെഡ് വര്‍ക്സ് ഡാമിനു തൊട്ടു താഴെ നിന്നും മുതിരപ്പുഴക്കു കുറുകെ പോതമേട് റോഡിനെ ബന്ധിപ്പിക്കുന്ന പാലത്തിന്റെ നിര്‍മാണജോലികള്‍ അതിവേഗം പുരോഗമിക്കുന്നു. മൂന്നാര്‍ പോതമേട്ടിലേക്ക് യാത്ര ചെയ്യാന്‍ ഹെഡ് വര്‍ക്ക്സ് അണക്കെട്ടിന് സമീപത്തു നിന്നും പുതിയൊരു പാലം നിര്‍മ്മിക്കണമെന്ന ആവശ്യം ഏറെ നാളുകളായി നിലനില്‍ക്കുന്നതാണ്.
പോതമേട് സ്വദേശികളുടെ പാലത്തിനു വേണ്ടിയുള്ള പതിറ്റാണ്ടുകളായുള്ള കാത്തിരിപ്പിന് വിരാമമിട്ടാണിപ്പോള്‍ ഹെഡ് വര്‍ക്സ് ഡാമിനു തൊട്ടു താഴെ നിന്നും മുതിരപ്പുഴയ്ക്കു കുറുകെ പോതമേട് റോഡിനെ ബന്ധിപ്പിക്കുന്ന പുതിയ പാലത്തിന്റെ നിര്‍മാണ ജോലികള്‍ പുരോഗമിക്കുന്നത്. പാലം യാഥാര്‍ത്ഥ്യമാകുന്നതോടെ പോതമേടിന്റെ വിനോദസഞ്ചാര മേഖലക്കുള്‍പ്പെടെ അത് പ്രയോജനകരമാകും.
പാലത്തിന്റെ 70 ശതമാനത്തോളം ജോലികള്‍ പൂര്‍ത്തീകരിച്ചതായും പാലം പണി പൂര്‍ത്തീകരിക്കപ്പെടുന്നതോടെ മൂന്നാറിലെ ഗതാഗതകുരുക്ക് കുറക്കാന്‍ സഹായിക്കുന്ന മാര്‍ഗ്ഗങ്ങളിലൊന്നായി പാലവും അനുബന്ധ റോഡുകളും മാറുമെന്നും അഡ്വ. എ രാജ എം എല്‍ എ പറഞ്ഞു. 6.80 കോടി രൂപ ചെലവിലാണു പുതിയ പാലം നിര്‍മിക്കുന്നത്. നിലവില്‍ ഹെഡ് വര്‍ക്ക്സ് അണക്കെട്ടിന് മുകളിലൂടെയാണ് ഏറ്റവും ഏളുപ്പത്തില്‍ പോതമേട്ടിലേക്ക് ആളുകള്‍ യാത്ര ചെയ്യുന്നത്.
വളരെ ഇടുങ്ങിയ പാലമായതിനാല്‍ ഇതുവഴി ചെറുവാഹനങ്ങള്‍ മാത്രമെ കടന്നു പോകുകയൊള്ളു. ഇത് വലിയ പ്രായോഗിക ബുദ്ധിമുട്ട് സൃഷ്ടിക്കുന്നുണ്ട്. ഗതാഗതകുരുക്കിനും ഇടവരുത്തുന്നു. പുതിയ പാലം തീരുന്നതോടെ ഈ പ്രശനത്തിന് പരിഹാരമാകും.
