അടിമാലി: ഇടുക്കി രൂപതയുടെ നേതൃത്വത്തില്‍ അടിമാലിയില്‍ വയോജന സംഗമം സംഘടിപ്പിച്ചു. അഞ്ച് വര്‍ഷങ്ങള്‍ക്ക് മുമ്പ് ഫ്രാന്‍സിസ് മാര്‍പാപ്പ പ്രഖ്യാപിച്ച ലോക മുത്തശ്ശി മുത്തച്ഛന്മാരുടെ ദിനാചരണത്തിന്റെ ഭാഗമായാണ് വയോജന ദിനം സംഘടിപ്പിച്ചത്. അടിമാലി സെന്റ് ജൂഡ് ഫൊറോന പള്ളിയിലായിരുന്നു വയോജന സംഗമം നടന്നത്. ഇടുക്കി രൂപതാ മെത്രാന്‍ മാര്‍ ജോണ്‍ നെല്ലിക്കുന്നേല്‍ വയോജന സംഗമം ഉദ്ഘാടനം ചെയ്തു.
രൂപത ഫാമിലി അപ്പസ്‌തോലേറ്റിന്റെ നേതൃത്വത്തിലാണ് പരിപാടികള്‍ ക്രമീകരിച്ചിരുന്നത്. രാവിലെ നടന്ന വിശുദ്ധ കുര്‍ബാനക്ക് മാര്‍ ജോണ്‍ നെല്ലിക്കുന്നേല്‍ കാര്‍മികത്വം വഹിച്ചു. ശേഷം നടന്ന പൊതുസമ്മേളനത്തില്‍ രൂപതാ മെത്രാന്‍ വയോജനങ്ങളെ ആദരിച്ചു. അടിമാലി സെന്റ് ജൂഡ് ഇടവകയിലെ വിവിധ ഭക്ത സംഘടനകളുടെ നേതൃത്വത്തില്‍ കലാപരിപാടികളും അരങ്ങേറി.അടിമാലി ഫൊറോന വികാരി ഫാ. ജോര്‍ജ് പാട്ടത്തേക്കുഴി, ഫാ. മാത്യു അഴകനാക്കുന്നേല്‍, സിസ്റ്റര്‍ പ്രദീപ സിഎംസി, സിസ്റ്റര്‍ സോഫിയ റോസ് സിഎംസി എന്നിവര്‍ സംസാരിച്ചു.
