ദേശിയപാതയിലെ നിര്‍മ്മാണ പ്രതിസന്ധി; അടിമാലിയില്‍ നാളെ വിശാല കണ്‍വന്‍ഷന്‍ സംഘടിപ്പിക്കും
അടിമാലി: ദേശീയപാത85ന്റെ ഭാഗമായ നേര്യമംഗലം വനമേഖലയിലെ നിര്‍മ്മാണ വിലക്ക് നീക്കുന്നതിന് സര്‍ക്കാര്‍ ഹൈക്കോടതിയില്‍ ഇനിയും അനുകൂലമായ സത്യവാങ്മൂലം സമര്‍പ്പിക്കാത്തതില്‍ ദേശിയപാത സംരക്ഷണ സമിതി തുടര്‍പ്രക്ഷോഭത്തിന് ഒരുങ്ങുന്നു. വിഷയത്തില്‍ തുടര്‍നടപടികളും പ്രതിഷേധ പരിപാടികളും ചര്‍ച്ച ചെയ്ത് തീരുമാനം കൈകൊള്ളുന്നതിനായി നാളെ അടിമാലിയില്‍ വിശാല കണ്‍വന്‍ഷന്‍ സംഘടിപ്പിക്കും. ദേശീയപാത85ന്റെ ഭാഗമായ നേര്യമംഗലം വനമേഖലയിലെ നിര്‍മ്മാണ വിലക്ക് നീക്കുന്നതുമായി ബന്ധപ്പെട്ട് സര്‍ക്കാര്‍ ഹൈക്കോടതിയില്‍ ഇനിയും അനുകൂലമായ സത്യവാങ്മൂലം സമര്‍പ്പിക്കാത്ത സാഹചര്യത്തിലാണ് തുടര്‍ പ്രതിഷേധ പരിപാടികളുമായി മുമ്പോട്ട് പോകാന്‍ ദേശിയപാത സംരക്ഷണ സമിതി തീരുമാനം കൈകൊണ്ടിട്ടുള്ളത്.
റോഡ് കടന്നു പോകുന്ന ഭാഗം റവന്യൂ ഭൂമിയാണെന്നതിന് എല്ലാ തെളിവുകളും കൈവശം ഉണ്ടായിട്ടും റോഡ് നിര്‍മ്മാണം നടക്കുന്ന ഭാഗം വനമാണെന്ന് പറഞ്ഞ് സര്‍ക്കാരിന് വേണ്ടി അഡീഷണല്‍ ചീഫ് സെക്രട്ടറി കഴിഞ്ഞ ജൂലൈ 11ന് നല്‍കിയ സത്യവാങ്മൂലമാണ് നിര്‍മ്മാണ വിലക്കിന് കാരണമായതെന്നും ആഗസ്റ്റ് 21ന് കോടതി കേസ് പരിഗണിച്ചപ്പോള്‍ സര്‍ക്കാരിന്റെ അഭിഭാഷകന്‍ റോഡ് നിര്‍മ്മാണം നടക്കുന്ന ഭാഗം വനമല്ല എന്ന് വാക്കാല്‍ പറഞ്ഞതിന് പകരം കൈവശമുള്ള റവന്യൂ രേഖകള്‍ കോടതിയില്‍ സമര്‍പ്പിച്ചിരുന്നെങ്കില്‍ റോഡ് നിര്‍മ്മാണം പുനരാരംഭിക്കാന്‍ കഴിയുമായിരുന്നുവെന്നും ദേശിയപാത സംരക്ഷണ സമിതി നേതൃത്വം വ്യക്തമാക്കി.
ഇക്കഴിഞ്ഞ 18ന് കോടതി കേസ് വീണ്ടും പരിഗണിച്ചിട്ടും റോഡിന് അനുകൂലമായ സത്യവാങ്മൂലം സര്‍ക്കാര്‍ സമര്‍പ്പിക്കാത്തത് ഈ വിഷയത്തിലുള്ള സര്‍ക്കാരിന്റെ ഇരട്ടത്താപ്പാണെന്നും ദേശിയപാത സംരക്ഷണ സമിതിയുടെ ആരോപിക്കുന്നു. റോഡുമായി ബന്ധപ്പെട്ട കേസ് കോടതി വീണ്ടും ഈ മാസം 7ന് പരിഗണിക്കും. സര്‍ക്കാര്‍ കോടതിയില്‍ റോഡ് നിര്‍മ്മാണത്തിനനുകൂലമായ സത്യവാങ്മൂലം നല്‍കണമെന്നാണ് ദേശിയപാത സംരക്ഷണ സമിതിയുടെ ആവശ്യം. അല്ലാത്ത പക്ഷം വിഷയത്തിനൊപ്പം നില്‍ക്കുന്ന രാഷ്ട്രീയ പാര്‍ട്ടികളുമായും മറ്റിതര സംഘടനകളുമായും കൈകോര്‍ത്ത് തുടര്‍ പ്രക്ഷോഭത്തിനൊരുങ്ങാനാണ് ദേശിയപാത സംരക്ഷണ സമിതിയുടെ തീരുമാനം.
വിഷയത്തില്‍ തുടര്‍നടപടികളും പ്രതിഷേധ പരിപാടികളും ചര്‍ച്ച ചെയ്ത് തീരുമാനം കൈകൊള്ളുന്നതിനായി നാളെ അടിമാലിയില്‍ വിശാല കണ്‍വന്‍ഷന്‍ സംഘടിപ്പിക്കും. ഉച്ചക്ക് ശേഷം രണ്ടിന് അടിമാലി ക്ലബ്ബില്‍ ആണ് വിശാല കണ്‍വന്‍ഷന്‍ നടക്കുന്നത്
