ദേശിയപാത വിഷയത്തില്‍ സര്‍ക്കാരിന്റെ തിരുത്തല്‍ സത്യവാങ്മൂലം; നിര്‍മ്മാണ വിലക്ക് നീങ്ങുമോ? പ്രതീക്ഷയോടെ മലയോരം
അടിമാലി: ദേശിയപാത85ന്റെ ഭാഗമായ നേര്യമംഗലം വനമേഖലയിലെ റോഡിന്റെ ഉടമസ്ഥാവകാശം സംബന്ധിച്ച് സര്‍ക്കാര്‍ കോടതിയില്‍ തിരുത്തല്‍ സത്യവാങ്ങ്മൂലം നല്‍കിയതോടെ തടസ്സപ്പെട്ട് കിടക്കുന്ന റോഡ് നിര്‍മ്മാണം കോടതി ഇടപെടലിലൂടെ വീണ്ടും പുനരാരംഭിക്കാനാകുമെന്ന പ്രതീക്ഷയിലാണ് ഈ റോഡിനെ ആശ്രയിച്ച് യാത്ര ചെയ്യുന്നവര്‍. ദേശിയപാത85ന്റെ ഭാഗമായ നേര്യമംഗലം വനമേഖലയിലെ നവീകരണ ജോലികളാണ് കഴിഞ്ഞ ഏതാനും മാസങ്ങളായി മുടങ്ങി കിടക്കുന്നത്.
ദേശിയപാത കടന്നുപോകുന്ന ഭാഗം വനഭൂമിയാണെന്ന സത്യവാങ്മൂലവും വനംവകുപ്പിന്റെ അനുമതിയില്ലാതെ മരങ്ങള്‍ മുറിച്ചുമാറ്റിയെന്നുമുള്ള ഹര്‍ജ്ജിയും കോടതിയില്‍ എത്തിയതോടെയായിരുന്നു നേര്യമംഗലം മുതല്‍ വാളറ വരെയുള്ള ഭാഗത്തെ നിര്‍മ്മാണ ജോലികള്‍ക്ക് കോടതി വിലക്കേര്‍പ്പെടുത്തിയത്. നേര്യമംഗലം വനമേഖലയിലൂടെ റോഡ് കടന്നു പോകുന്ന ഭാഗം റവന്യു ഭൂമിയാണെന്നതിന് രേഖകളുണ്ടെന്നും എന്നിട്ടും സര്‍ക്കാര്‍ തെറ്റായ സത്യവാങ്മൂലം കോടതിയില്‍ നല്‍കിയെന്നുമായിരുന്നു ഇക്കാര്യത്തില്‍ സര്‍ക്കാരിനെതിരെ ഉയര്‍ന്ന വിമര്‍ശനം. മുമ്പ് നല്‍കിയ സത്യവാങ്മൂലം തിരുത്തി നല്‍കണമെന്നും ആവശ്യമുയര്‍ന്നു.
ഇതില്‍ കാലതാമസം വന്നതോടെ ജനകീയ പ്രതീഷേധവും രൂപംകൊണ്ടു. ഈ സാഹചര്യത്തിലായിരുന്നു സര്‍ക്കാര്‍ വിഷയത്തില്‍ കോടതിയില്‍ തിരുത്തല്‍ സത്യവാങ്മൂലം സമര്‍പ്പിച്ചത്. സര്‍ക്കാര്‍ കോടതിയില്‍ തിരുത്തല്‍ സത്യവാങ്ങ്മൂലം നല്‍കിയതോടെ തടസ്സപ്പെട്ട് കിടക്കുന്ന റോഡ് നിര്‍മ്മാണം കോടതി ഇടപെടലിലൂടെ വീണ്ടും പുനരാരംഭിക്കാനാകുമെന്ന പ്രതീക്ഷയിലാണ് ഈ റോഡിനെ ആശ്രയിച്ച് യാത്ര ചെയ്യുന്നവര്‍. ചീഫ് സെക്രട്ടറിയാണ് സര്‍ക്കാരിന് വേണ്ടി കോടതിയില്‍ പുതിയ സത്യവാങ്ങ്മൂലം സമര്‍പ്പിച്ചത്.
കോടതി ഇത് ഫയലില്‍ സ്വീകരിച്ചു.കേസ് ഈ മാസം 13ന് കോടതി വീണ്ടും പരിഗണിക്കും. റോഡും സമീപത്തെ 50 അടി വീതിയില്‍ ഭൂമിയും പോതുമരാമത്ത് വകുപ്പിന്റേതാണെന്നും രാജഭരണകാലത്ത് തന്നെ ഈ ഭൂമി വനംവകുപ്പില്‍ നിന്ന് ഒഴിവാക്കിയിരുന്നുവെന്നും പുതിയ സത്യവാങ്മൂലത്തില്‍ പറയുന്നു.
