നെടുങ്കണ്ടം: നിര്‍മാണത്തിലിരുന്ന വീട്‌ പാറക്കഷണങ്ങള്‍ വീണ്‌ തകര്‍ന്നു.
അടച്ചുറപ്പുള്ള കൂരയിലേക്ക്‌ മാറാമെന്ന സ്വപ്‌നമാണ്‌ മഴ തകര്ത്തത്..രാമക്കല്‍മേട്‌ ആമപ്പാറയില്‍ മഴയില്‍ പാറക്കഷണങ്ങള്‍ പതിച്ച്‌ നിര്‍മാണത്തിലിരുന്ന വീട്‌ തകര്‍ന്നു.
പി.എം.എ.വൈ പദ്ധതിയിലൂടെ ലഭിച്ച വീടാണു നശിച്ചത്‌. ആമപ്പാറ ചെറുകുന്നേല്‍ രമേശന്റെതാണ്‌ തകര്‍ന്ന വീട്‌. കഴിഞ്ഞദിവസം പെയ്‌ത കനത്ത മഴയെത്തുടര്‍ന്ന്‌ കൂറ്റന്‍ പാറക്കഷണങ്ങള്‍ ഇളകി വീടിന്‌ മുകളിലേക്ക്‌ പതിക്കുകയായിരുന്നു. വീടിന്റെ കട്ടളയും ജനലും ഉള്‍പ്പെടെ ഇളകിപ്പോയി.
തൊട്ടടുത്ത ഷെഡിലാണ്‌ രമേശനും ഭാര്യയും രണ്ടു മക്കളും അടങ്ങുന്ന കുടുംബം നിലവില്‍ താമസിക്കുന്നത്‌.
ഷെഡ്‌ഡില്‍ നിന്നും അടച്ചുറപ്പുള്ള കൂരയിലേക്ക്‌ മാറാമെന്ന സ്വപ്‌നമാണ്‌ മഴ തകര്ത്തത്. ആകെ നാല്‌ ലക്ഷം രൂപയാണ്‌ വീടിനായി അനുവദിക്കുന്നത്‌. ഇതില്‍ രണ്ട്‌ ഗഡുക്കളായി ഒരു ലക്ഷത്തി അന്‍പത്തിയെനായിരം രൂപ ലഭിച്ചു. നിരവധിപേരില്‍ നിന്നും കടം വാങ്ങിയും മറ്റുമാണ്‌ വീട്‌ കട്ടിളപ്പൊക്കം വരെ എത്തിച്ചത്‌. ഇനിയെന്തു ചെയ്യുമെന്നറിയാതെ തകര്‍ന്നുപോയിരിക്കുകയാണ്‌ ഈ കുടുംബം.
