തിരഞ്ഞെടുപ്പ് തോൽവി; സിപിഐഎം നേതൃത്വത്തെ വിമർശിച്ച് നേതാക്കൾക്ക് കത്ത് പ്രവാഹം, കത്തെഴുത്തിന് പിന്നിൽ പി.ജയരാജന്റെ ആഹ്വാനം

തിരഞ്ഞെടുപ്പ് തോൽവിക്ക് പിന്നാലെ സിപിഐഎം നേതൃത്വത്തെ വിമർശിച്ച് നേതാക്കൾക്ക് കത്ത് പ്രവാഹം. തോൽവിക്ക് കാരണമായ വിഷയങ്ങൾ ചൂണ്ടിക്കാട്ടി ഇ – മെയിലായാണ് കത്തുകൾ ലഭിക്കുന്നത്. തോൽവിയെ കുറിച്ചുളള അഭിപ്രായങ്ങൾ കത്തെഴുതി അറിയിക്കണമെന്ന പി.ജയരാജന്റെ ആഹ്വാനത്തിന് പിന്നാലെയാണ് കത്തെഴുത്ത്. സിപിഐഎമ്മിന്റെ ചരിത്രത്തിൽ തന്നെയുള്ള ഏറ്റവും വലിയ തോൽവിയാണ് ഈ നിയമസഭാ തിരഞ്ഞെടുപ്പിൽ നേത്യത്വം സാക്ഷ്യം വഹിച്ചത്. അണികളും സാധാരണ പ്രവർത്തകരും പലതരത്തിലുള്ള കാരണങ്ങൾ തോൽവിയുമായി ബന്ധപ്പെട്ട് നേരത്തെ തന്നെ ചൂണ്ടിക്കാട്ടിയിരുന്നു.

ലോക്സഭാ തിരഞ്ഞെടുപ്പിലും തദ്ദേശ തിരഞ്ഞെടുപ്പിലും ഫലം വന്നപ്പോഴും ഇത്തരം കാരണങ്ങൾ അണികൾ ചൂണ്ടിക്കാട്ടിയിരുന്നു. എന്നാൽ തിരുത്തൽ നടപടികൾ സ്വീകരിക്കുമെന്ന പൊതു പ്രഖ്യാപനങ്ങൾ അല്ലാതെ ഒരുതരത്തിലുള്ള തിരുത്തലുകളും നടത്തിയില്ല. നേരത്തെ വിഭാഗീയത കൊടുമ്പിരി കൊണ്ടിരുന്ന കാലത്ത് ഇത്തരത്തിലുള്ള കത്തുകൾ പാർട്ടിയുടെ ദേശീയ നേത്യത്വത്തിനും മറ്റ് നേതാക്കൾക്കും അയക്കുന്ന രീതി ഉണ്ടായിരുന്നു അതിന്റെയെല്ലാം തനിയാവർത്തനമാണ് ഇപ്പോൾ നടക്കുന്നത്.

അതേസമയം, കണ്ണൂരിലെ കനത്ത തോൽവിയുടെ ഉത്തരവാദിത്തത്തിൽ നിന്നും പിണറായിക്കും സെക്രട്ടറി എം വി ഗോവിന്ദനും ഒളിച്ചോടാൻ ആകില്ല. അതുകൊണ്ടുതന്നെ പാർലമെൻ്ററി നേതൃത്വത്തിലും സംഘടനാ നേതൃത്വത്തിലും അഴിച്ചുപണി വേണമെന്നാണ് ആവശ്യം. അസാധാരണമായ തിരിച്ചടിയാണ് പാർട്ടി നേരിട്ടത് , അപ്പോൾ അസാധാരണ നടപടി തന്നെ വേണമെന്നും നേതാക്കൾ ആവശ്യപ്പെടുന്നു.

25 സീറ്റിൽ മത്സരിച്ച പാർട്ടി 8 സീറ്റിലേക്ക് കൂപ്പുകുത്തിയോടെ സിപിഐയിലും ബിനോയ് വിശ്വത്തെ മാറ്റണമെന്ന് ആവശ്യം ഉയരുന്നുണ്ട്. സ്ഥാനാർത്ഥി നിർണയത്തിലെ പാളിച്ചയാണ് തോൽവിയുടെ പ്രധാന കാരണമായി സിപിഐ നേതാക്കൾ ചൂണ്ടിക്കാട്ടുന്നത്. നാദാപുരം അടക്കമുള്ള സീറ്റുകളിൽ സംസ്ഥാന സെക്രട്ടറിയുടെ പിടിവാശിയാണ് നടപ്പിലായത് . പ്രചരണ തന്ത്രങ്ങൾ രൂപപ്പെടുത്തുന്നതിലും രാഷ്ട്രീയ നിലപാടുകൾ ഉയർത്തിപ്പിടിക്കുന്നതിലും ബിനോയ് വിശ്വം തികഞ്ഞ പരാജയം ആണെന്നും വിമർശനം ഉണ്ട്.

രാഷ്ട്രീയ പക്വതയും പരിചയസമ്പത്തുമുള്ളവരെ സെക്രട്ടറി സ്ഥാനത്ത് നിയോഗിച്ചില്ലെങ്കിൽ പാർട്ടിയുടെ അവസ്ഥ കൂടുതൽ ദുർബലമാകും എന്നാണ് സിപിഐയിൽ ഉയർന്നുവരുന്ന അഭിപ്രായം . സിപിഎമ്മിന്റെ തീരുമാനങ്ങൾക്ക് തുല്യം ചാർത്തുന്ന നിലയിലേക്ക് പാർട്ടിയെ കൊണ്ടുപോയത് ബിനോയ് വിശ്വത്തിന്റെ പരാജയം ആണെന്നും വിമർശകർ കുറ്റപ്പെടുത്തുന്നു. തിരഞ്ഞെടുപ്പിലെ കനത്ത തോൽവി ഇടതുപക്ഷ പാർട്ടികളിൽ ഉണ്ടാക്കുന്ന ചലനങ്ങളുടെ ആദ്യ സൂചനകളാണിത്