അടിമാലി: അടിമാലി കോട്ടപ്പാറയില്‍ വച്ച് ഡിവൈഎഫ്‌ഐ പ്രവര്‍ത്തകരെ ആക്രമിച്ച സംഭവത്തില്‍ ഒരാള്‍ അടിമാലി പോലീസിന്റെ പിടിയിലായി. വിനോദ സഞ്ചാര മേഖലയായ കോട്ടപ്പാറയില്‍ വച്ച് പരസ്യമായി ലഹരി ഉപയോഗിച്ചത് ചോദ്യം ചെയ്തതിനെ തുടര്‍ന്ന് ഒരു പറ്റം ആളുകള്‍ ചേര്‍ന്ന് മര്‍ദ്ദിച്ചുവെന്നായിരുന്നു ഡി വൈ എഫ് ഐ പ്രവര്‍ത്തകരുടെ പരാതി. ഈ പരാതിയിലാണ് ഒരാള്‍ അടിമാലി പോലീസിന്റെ പിടിയിലായിട്ടുള്ളത്. മൂലമറ്റം അറക്കുളം സ്വദേശി ജിബിന്‍ ബിജുവിനെയാണ് പോലീസ് അറസ്റ്റ് ചെയ്തത്. അറക്കുളത്ത് നിന്നുമാണ് പോലീസ് ഇയാളെ കസ്റ്റഡിയില്‍ എടുത്തത്. സംഭവത്തില്‍ ഉള്‍പ്പെട്ടിട്ടുള്ള മറ്റ് പ്രതികള്‍ ഒളിവിലാണ്. ഇവര്‍ക്കായി പൊലീസ് അന്വേഷണം നടത്തുന്നുണ്ട്. അക്രമ സംഭവത്തില്‍ രണ്ട് ഡി വൈ എഫ് ഐ പ്രവര്‍ത്തകര്‍ക്കായിരുന്നു മര്‍ദ്ദനമേറ്റത്. ഒരാളുടെ കാല്‍ ഒടിയുകയും മറ്റൊരാളുടെ തലക്ക് പരിക്ക് സംഭവിക്കുകയും ചെയ്തു. ഇവര്‍ അടിമാലി താലൂക്കാശുപത്രിയില്‍ ചികിത്സ തേടിയിരുന്നു.
