അടിമാലി: ഏറെ പ്രതീക്ഷയോടെയാണ് കൊച്ചി ധനുഷ്‌ക്കോടി ദേശിയപാതയുടെ വികസനപ്രവര്‍ത്തനങ്ങളെ ഹൈറേഞ്ച് മേഖല നോക്കി കാണുന്നത്.പാതയുടെ നവീകരണ ജോലികള്‍ അതിവേഗം പുരോഗമിക്കുകയാണ്. മണ്ണ് നീക്കിയും സംരക്ഷണ ഭിത്തികള്‍ തീര്‍ത്തും പാതയുടെ വീതി വര്‍ധിപ്പിക്കുന്ന മണ്‍ജോലികളാണിപ്പോള്‍ നടന്നു വരുന്നത്. ഓടകളുടെ നിര്‍മ്മാണവും നടക്കുന്നു.കൊച്ചി മുതല്‍ മൂന്നാര്‍ വരെ 125 കിലോമീറ്റര്‍ ദൈര്‍ഘ്യത്തിലാണ് പദ്ധതി നടപ്പിലാക്കുന്നത്. 910 കോടി രൂപക്കാണ് പദ്ധതിയുടെ കരാര്‍ ഏറ്റെടുത്തിരിക്കുന്നത്.
പദ്ധതിയുടെ 110 കിലോമീറ്റര്‍ ദൂരവും വീതികൂട്ടി നവീകരിക്കാന്‍ ലക്ഷ്യമിടുന്നു. പാത മുഖം മിനുക്കുന്നതോടെ അടിമാലിയുടെയും മൂന്നാറിന്റെയും വാണിജ്യ മേഖലക്കും വിനോദ സഞ്ചാര മേഖലക്കും കരുത്താകും. അതേ സമയം പാതയുടെ വീതി വര്‍ധിപ്പിക്കുന്നുവെങ്കിലും കൊടും വളവുകള്‍ നിവര്‍ത്തുന്നില്ലെന്ന പരാതിയും റോഡ് നിര്‍മ്മാണം സംബന്ധിച്ച് ഉയരുന്നുണ്ട്. നേര്യമംഗലത്ത് പുതിയ പാലവും പദ്ധതിയില്‍ ഉള്‍പ്പെടുത്തി നിര്‍മ്മിക്കുന്നുണ്ട്. ഇതിന്റെ പ്രവര്‍ത്തനങ്ങള്‍ പുരോഗമിക്കുകയാണ്.
5 സ്പാനുകളിലായി 42.80 മീറ്റര്‍ നീളത്തില്‍ 13 മീറ്റര്‍ വീതിയിലുമാണ് പുതിയ പാലത്തിന്റെ നിര്‍മാണം. നിലവില്‍ നേര്യമംഗലം മുതല്‍ മൂന്നാര്‍ വരെയുള്ള പാതയുടെ വീതി കുറവ് തിരക്കേറുന്ന സമയങ്ങളില്‍ ഗതാഗതകുരുക്കിനും അപകടങ്ങള്‍ക്കും ഇടവരുത്താറുണ്ട്. പാതയുടെ നവീകരണം സാധ്യമാകുന്നതോടെ ഗതഗത കുരുക്കിന് പരിഹാരമാകുമെന്നാണ് പ്രതീക്ഷ.
