മൂന്നാര്‍: കാട്ടാനപ്പേടിക്ക് പിന്നാലെ മൂന്നാറില്‍ പുലിപ്പേടിയും വര്‍ധിക്കുന്നു.കാട്ടുകൊമ്പന്‍മാരടക്കം മൂന്നാര്‍ മേഖലയില്‍ കാടിറങ്ങി ഭീതി പരത്തുന്ന സംഭവം സാധാരണയായി കഴിഞ്ഞു.ഇതിനൊപ്പമാണിപ്പോള്‍ പുലിപ്പേടിയും വര്‍ധിച്ചിട്ടുള്ളത്. ടൗണിന് സമീപമുള്ള മൂന്നാര്‍ ഫോറസ്റ്റ് റെയിഞ്ചോഫീസിന് സമീപമാണ് കഴിഞ്ഞ ദിവസം പകല്‍ പുലിയുടെ സാന്നിധ്യം ശ്രദ്ധയില്‍പ്പെട്ടത്. തോട്ടം തൊഴിലാളികളാണ് പുലിയെ നേരില്‍ കണ്ടത്.പിന്നീട് സംഭവം വനം വകുപ്പുദ്യോഗസ്ഥരെ അറിയിച്ചു.
പുലിയുടെ സാന്നിധ്യം ശ്രദ്ധയില്‍പ്പെട്ട ഭാഗം കൊളുന്തെടുക്കാന്‍ മാത്രം തൊഴിലാളികള്‍ എത്തുന്ന ജനവാസമില്ലാത്ത പ്രദേശമാണ്. സംഭവത്തില്‍ വനം വകുപ്പ് പരിശോധന നടത്തുന്നുണ്ട്. ഇരുപത് പേരടങ്ങുന്ന രണ്ട് സംഘങ്ങള്‍ പരിശോധനക്കുണ്ട്. തോട്ടം മേഖലയിലെ വിവിധയിടങ്ങളില്‍ മുമ്പ് കടുവയുടെയും പുലിയുടെയുമൊക്കെ സാന്നിധ്യം ഉണ്ടായിട്ടുണ്ട്.
വന്യ ജീവിയാക്രമണത്തില്‍ വളര്‍ത്ത് മൃഗങ്ങള്‍ കൊല്ലപ്പെടുന്ന സാഹചര്യവുമുണ്ട്.വേനല്‍ കനക്കുന്നതോടെ വന്യജീവി ശല്യം വര്‍ധിക്കുമോയെന്ന ആശങ്ക നിലനില്‍ക്കെയാണ് മൂന്നാര്‍ ടൗണിന് ഏതാനും ദൂരമകലെ പുലിയുടെ സാന്നിധ്യമുണ്ടായിട്ടുള്ളത്.
