ഇടുക്കി : മുരിക്കുംതൊട്ടിയിലെ തൊഴിലുറപ്പ് തൊഴിലാളികൾ മണ്ണുമാറ്റുന്നതിനിടയിലാണ് ആ വിചിത്ര രൂപം ശ്രദ്ധയിൽ പെട്ടത്. ഒറ്റനോട്ടത്തിൽ ബ്രെഡ് കഷ്ണങ്ങൾ ഒന്നിനുമുകളിൽ ഒന്നായി അടുക്കിവെച്ചതുപോലെയുള്ള വിചിത്രമായ പാളികൾ. സാധാരണ കല്ലുകൾക്കൊന്നും ഇല്ലാത്ത കടും തവിട്ടും ക്രീമും കലർന്ന നിറവ്യത്യാസം. കൗതുകം തോന്നി കൈയിലെടുത്തപ്പോഴാണ് തൊഴിലാളികൾ ശരിക്കും ഞെട്ടിയത്. ഒരു ചെറിയ കല്ലിന് രണ്ട് കിലോയോളം ഭാരം ആണ് ഉള്ളത്.
വിവരമറിഞ്ഞ് ഓടിയെത്തിയ നാട്ടുകാരും ഇതോടെ അത്ഭുതത്തിലായി. വനംവകുപ്പ് അധികൃതർ സ്ഥലത്തെത്തി പ്രാഥമിക പരിശോധന നടത്തിയതോടെയാണ് കൗതുകം കടുത്ത ആകാംഷയ്ക്ക് വഴിമാറിയത്. ലക്ഷക്കണക്കിന് വർഷങ്ങൾക്ക് മുൻപ് ഭൂമിയിലുണ്ടായിരുന്ന ഭീമൻ ആനകളുടെയോ, ഐസ് ഏജ് സിനിമകളിലൊക്കെ നമ്മൾ കണ്ടിട്ടുള്ള വംശനാശം സംഭവിച്ച ‘മാമത്തു’കളുടെയോ അണപ്പല്ലിന്റെ ഫോസിലാകാം (Fossilized Molar) ഇതെന്നാണ് ഉദ്യോഗസ്ഥരുടെ നിഗമനം.
ശാസ്ത്രീയമായി പരിശോധിച്ചാൽ ആനകളുടെ അണപ്പല്ലുകൾ ‘സിമന്റം’ എന്ന പദാർത്ഥം കൊണ്ട് ഒട്ടിപ്പിടിച്ച ഇനാമൽ പാളികളാലാണ് നിർമ്മിച്ചിരിക്കുന്നത്. കാലക്രമേണ ഇത് മണ്ണടിഞ്ഞ്, ധാതുക്കൾ അടിഞ്ഞുകൂടി ‘ഫോസിലായി’ മാറുമ്പോൾ കല്ല് പോലെ കട്ടിയാകുകയും ഭാരം കൂടുകയും ചെയ്യും. ഈ ഒരു ഘടനയാണ് മുരിക്കുംതൊട്ടിയിൽ കിട്ടിയ വസ്തുവിലും കാണാനാകുന്നത്.ഇതൊരു യഥാർത്ഥ ഫോസിലാണെങ്കിൽ, പണ്ട് ഇടുക്കിയിലെ കാടുകളിൽ ‘സ്റ്റെഗോഡൺ’ (Stegodon) എന്നറിയപ്പെടുന്ന പ്രാചീന നേർക്കൊമ്പൻ ആനകൾ ജീവിച്ചിരുന്നു എന്നതിന്റെ ഏറ്റവും വലിയ തെളിവായിരിക്കും ഇത്!ബൈറ്റ് ജോഷി ( വാർഡ് മെമ്പർ )പ്രകൃതി ചിലപ്പോൾ ഇരുമ്പിന്റെ അംശമുള്ള പാറകളെ ഇതേ രൂപത്തിൽ മാറ്റിയെടുക്കാറുമുണ്ട് (Ironstone Concretions).
അതുകൊണ്ട് തന്നെ ഈ വിചിത്ര വസ്തു വെറുമൊരു പാറക്കഷ്ണമാണോ, അതോ കോടാനുകോടി വർഷങ്ങളുടെ പഴക്കമുള്ള ചരിത്രശേഷിപ്പാണോ എന്നറിയാൻ റവന്യൂ അധികൃതർ ഇത് പുരാവസ്തു വകുപ്പിന് (Archeology Department) കൈമാറാൻ ഒരുങ്ങുകയാണ്. ലാബ് പരിശോധനകൾ പൂർത്തിയാകുന്നതോടെ ഇടുക്കിയുടെ മണ്ണിൽ ഒളിഞ്ഞിരിക്കുന്ന വലിയൊരു ചരിത്രരഹസ്യത്തിന്റെ ചുരുളഴിയുമെന്ന പ്രതീക്ഷയിലാണ് ശാസ്ത്രലോകവും മുരിക്കുംതൊട്ടി ഗ്രാമവും.
