ആറാമത് മൂന്നാര്‍ മാരത്തണ്‍ അടുത്തവര്‍ഷം ജനുവരി 24, 25 തീയതികളില്‍ നടക്കും
മൂന്നാര്‍: സാഹസിക വിനോദസഞ്ചാരം പ്രോത്സാഹിപ്പിക്കുന്നതിന്റെ ഭാഗമായി കെസ്ട്രല്‍ അഡ്വഞ്ചേഴ്‌സ് സംഘടിപ്പിക്കുന്ന ആറാമത് മൂന്നാര്‍ മാരത്തണ്‍ അടുത്തവര്‍ഷം ജനുവരി 24, 25 തീയതികളില്‍ നടക്കും. 24-ന് 71 കിലോമീറ്റര്‍ അള്‍ട്രാ ചലഞ്ച്, 25 ന് 42 കിലോ മീറ്റര്‍ ഫുള്‍മാരത്തണ്‍, 21 കിലോമീറ്റര്‍ ഹാഫ് മാരത്തണ്‍, 7 കിലോമീറ്റര്‍ റണ്‍ ഫോര്‍ ഫണ്‍ എന്നിവ നടക്കും. ഇതുമായി ബന്ധപ്പെട്ട ഒരുക്കങ്ങള്‍ പുരോഗമിക്കുകയാണെന്ന് സംഘാടകര്‍ അറിയിച്ചു.
മാരത്തണിന്റെ ഭാഗമായി ഭിന്നശേഷിക്കാര്‍ക്കായി പ്രത്യേക മത്സരങ്ങള്‍ സംഘടിപ്പിക്കും. പരിപാടിയോടനുബന്ധിച്ച് ജനുവരി 22 മുതല്‍ 26 വരെ വസ്ത്രങ്ങള്‍ക്ക് പ്രകൃതിദത്ത നിറം നല്‍കല്‍, ബോട്ടാണിക്കല്‍ പ്രിന്റിങ്ങ് തുടങ്ങിയവയുടെ പ്രദര്‍ശനവും പരിശീലനവും സംഘടിപ്പിക്കും. കഴിഞ്ഞ അഞ്ചുവര്‍ഷമായി നടക്കുന്ന മത്സരത്തില്‍ ഇതുവരെ വിദേശികള്‍ ഉള്‍പ്പെടെ ഏഴായിരത്തിലധികം പേര്‍ പങ്കെടുത്തിട്ടുണ്ടെന്നും എ. രാജ എംഎല്‍എ, കെസ്ട്രല്‍ അഡ്വഞ്ചേഴ്‌സ് ഭാരവാഹി സെന്തില്‍ എന്നിവര്‍ പറഞ്ഞു.
