മാങ്കുളത്ത് മിഷന്‍ റിയല്‍ ടൈംസ് മോണിറ്ററിംഗ് പദ്ധതി നടപ്പിലാക്കാന്‍ ഒരുങ്ങി വനംവകുപ്പ്
മാങ്കുളം: മനുഷ്യ വന്യജീവി സംഘര്‍ഷം ലഘൂകരിക്കുകയെന്ന ലക്ഷ്യത്തോടെ മിഷന്‍ റിയല്‍ ടൈംസ് മോണിറ്ററിംഗ് പദ്ധതി മാങ്കുളത്ത് നടപ്പിലാക്കാന്‍ ഒരുങ്ങി വനംവകുപ്പ്. മനുഷ്യ വന്യജീവി സംഘര്‍ഷം കൂടുതലായി നിലനില്‍ക്കുന്ന ഇടങ്ങളില്‍ ഒന്നാണ് മാങ്കുളം. ഈ മേഖലയിലെ മനുഷ്യ വന്യജീവി സംഘര്‍ഷം ലഘൂകരിക്കുകയെന്ന ലക്ഷ്യത്തോടെയാണ് വനംവകുപ്പ് മിഷന്‍ റിയല്‍ ടൈംസ് മോണിറ്ററിംഗ് പദ്ധതി നടപ്പിലാക്കാന്‍ ഒരുങ്ങുന്നത്. വനംവകുപ്പിന്റെ മാങ്കുളം ഫോറസ്റ്റ് ഡിവിഷന്റെ നേതൃത്വത്തില്‍ വനാതിര്‍ത്തികളില്‍ നിരീക്ഷണ ക്യാമറകള്‍ സ്ഥാപിക്കുകയും ഈ മേഖലയില്‍ വന്യജീവികളുടെ സാന്നിധ്യം ഉണ്ടായാല്‍ ആളുകള്‍ക്ക് ജാഗ്രതാ നിര്‍ദ്ദേശം നല്‍കുകയും ചെയ്യുന്നതാണ് പദ്ധതി.
ഇതുമായി ബന്ധപ്പെട്ട് ക്യാമറകള്‍ സ്ഥാപിക്കുന്നതിനുള്ള പ്രവര്‍ത്തനങ്ങള്‍ പുരോഗമിക്കുകയാണെന്ന് ഹെറേഞ്ച് സര്‍ക്കിള്‍ ചീഫ് കണ്‍സര്‍വേറ്റര്‍ ആര്‍ എസ് അരുണ്‍ പറഞ്ഞു. കിംസ് ഹെല്‍ത്ത് കെയറിന്റെ സി എസ് ആര്‍ ധനസഹായത്തോടെയും ഇടുക്കി എഞ്ചിനിയറിംഗ് കോളേജിന്റെ സാങ്കേതിക സഹായത്തോടെയും ആര്‍ട്ടിഫിഷ്യല്‍ ഇന്റലിജസ് അടിസ്ഥാനമാക്കി ക്യാമറകള്‍ സ്ഥാപിക്കുന്നതിനുള്ള നടപടികളാണ് പുരോഗമിക്കുന്നത്. പദ്ധതിയുടെ ട്രയല്‍ റണ്‍ വിജയിച്ചതായും വനംവകുപ്പ് അറിയിച്ചു. ജനവാസ മേഖലക്കരികെ കാട്ടാനയടക്കമുള്ള വന്യജീവികളുടെ സാന്നിധ്യം മുന്‍കൂട്ടി തിരിച്ചറിയാന്‍ സാധിച്ചാല്‍ ജനവാസ മേഖലയിലേക്കെത്തും മുമ്പെ അവയെ വനത്തിലേക്ക് തുരത്താന്‍ പദ്ധതി സഹായിക്കുമെന്നാണ് വനംവകുപ്പിന്റെ പ്രതീക്ഷ.
