അടിമാലി: മാങ്കുളത്ത് പണി കഴിപ്പിക്കുമെന്ന് പ്രഖ്യാപിച്ച ബസ് സ്റ്റാന്‍ഡിന്റെ നിര്‍മ്മാണ ജോലികള്‍ക്കായുള്ള ഇടപെടല്‍ വേണമെന്ന ആവശ്യം ശക്തം. മാങ്കുളം റേഷന്‍കട സിറ്റിക്ക് സമീപം ബസ് സ്റ്റാന്‍ഡ് നിര്‍മ്മിക്കാനായിരുന്നു ലക്ഷ്യമിട്ടിരുന്നത്. ഇതിനായി വര്‍ഷങ്ങള്‍ക്ക് മുമ്പ് പഞ്ചായത്ത് സ്ഥലം വാങ്ങിക്കുകയും ചെയ്തു. സ്ഥലം വാങ്ങിയ ശേഷം മണ്ണ് നീക്കുന്ന ചില നിര്‍മ്മാണ ജോലികള്‍ നടത്തി.പിന്നീട് തുടര്‍ജോലികള്‍ ഒന്നുമുണ്ടായില്ല. ഇതോടെ വര്‍ഷങ്ങള്‍ക്ക് മുമ്പ് പ്രഖ്യാപിച്ച പദ്ധതി ഇപ്പോഴും യാഥാര്‍ത്ഥ്യമാകാതെ തുടരുകയാണ്.
മണ്ണ് നീക്കിയ പ്രദേശമാകെ കാടുമൂടി കഴിഞ്ഞു. ഏറെ പ്രതീക്ഷയോടെ പ്രഖ്യാപിച്ച പദ്ധതി യാഥാര്‍ത്ഥ്യമാക്കാന്‍ തുടര്‍ ഇടപെടലുകള്‍ വേണമെന്ന ആവശ്യമാണുയരുന്നത്. മാങ്കുളം ടൗണിന്റെ വികസനത്തിന് കരുത്താകാന്‍ സഹായിക്കുന്ന പദ്ധതിയാണ് തുടക്കത്തിലെ തന്നെ നിലച്ച് കിടക്കുന്നത്. നിലവില്‍ പള്ളി സിറ്റിക്ക് സമീപം പഞ്ചായത്ത് നിര്‍മ്മിച്ചിട്ടുള്ള ബസ് കാത്തിരിപ്പ് കേന്ദ്രത്തിന് സമീപമാണിപ്പോള്‍ ബസുകള്‍ നിര്‍ത്തിയിടുന്നത്. കെ എസ് ആര്‍ ടി സി ബസുകളും സ്വകാര്യ ബസുകളും മാങ്കുളം അടിമാലി റൂട്ടില്‍ സര്‍വ്വീസ് നടത്തുന്നുണ്ട്.
വിനോദ സഞ്ചാരമേഖലയായി മാറി നിരവധി വാഹനങ്ങള്‍ എത്തിതുടങ്ങിയതോടെ ടൗണില്‍ തിരക്ക് വര്‍ധിച്ചിട്ടുണ്ട്. ബസ് സ്റ്റാന്‍ഡും അനുബന്ധ നിര്‍മ്മാണജോലികളും സാധ്യമാക്കിയാല്‍ മാങ്കുളം ടൗണിന്റെ മുഖഛായ തന്നെ മാറും. പ്രഖ്യാപിച്ച പദ്ധതി യാഥാര്‍ത്ഥ്യമാക്കാന്‍ ബന്ധപ്പെട്ടവരുടെ ഇടപെടല്‍ വേണമെന്നാണ് ആവശ്യം.
