അടിമാലി താലൂക്ക് ആശുപത്രിയിലെ പ്രസവവാര്‍ഡും ലേബര്‍ റൂമും പ്രവര്‍ത്തിക്കുന്നത് ബലക്ഷയം വന്ന കെട്ടിടത്തിലെന്ന് പരാതി..
അടിമാലി : അടിമാലി താലൂക്കാശുപത്രിക്കായി പുതിയ കെട്ടിട സൗകര്യമൊരുങ്ങുമ്പോഴും ആശുപത്രിയിലെ പ്രസവ വാര്‍ഡ് പ്രവര്‍ത്തിക്കുന്നത് വേണ്ടവിധം ഉറപ്പില്ലാത്ത ബലക്ഷയമുള്ള കെട്ടിടത്തിലാണെന്നാണ് പരാതി. ലേബര്‍ റൂമിന് പുറമെ നവജാത ശിശുക്കളുടെ പരിശോധന മുറി, പ്രസവവാര്‍ഡ്, ഫാര്‍മസി സ്റ്റോര്‍ ഇവയും ഈ കെട്ടിടത്തില്‍ പ്രവര്‍ത്തിച്ച് വരുന്നു. ഏറെ വര്‍ഷത്തെ പഴക്കമുണ്ട് ഈ കെട്ടിടത്തിന്. കെട്ടിടത്തിന്റെ പല ഭാഗത്തും വിള്ളല്‍ രൂപം കൊണ്ടിട്ടുള്ള സ്ഥിതിയുണ്ട്. ഭിത്തിയുടെ ഭാഗങ്ങള്‍ ചിലയിടങ്ങളില്‍ അടര്‍ന്ന് പോയിട്ടുണ്ട്. വേണ്ടത്ര ഉറപ്പില്ലാത്ത ഈ കെട്ടിടത്തില്‍ നിന്നും പ്രസവ വാര്‍ഡും അനുബന്ധ വിഭാഗങ്ങളും സുരക്ഷിതമായ മറ്റൊരിടത്തേക്ക് മാറ്റണമെന്നാണ് ആവശ്യം.
സദാസമയവും സ്ത്രീകളുടെയും ഗര്‍ഭിണികളുടെയും കുഞ്ഞുങ്ങളുടെയും കൂട്ടിരിപ്പുകാരുടെയുമൊക്കെ സാന്നിധ്യമുള്ള ഇടമാണ് ആശുപത്രിയുടെ ഭാഗമായി പരാതിക്ക് ഇടവരുത്തിയിട്ടുള്ള പഴയ കെട്ടിടം. ഏതെങ്കിലും സാഹചര്യത്തില്‍ കെട്ടിട ഭാഗം അടര്‍ന്ന് വീണാല്‍ പോലും അത് വലിയ അപകടത്തിന് വഴിയൊരുക്കും. നിലവില്‍ ക്യാഷ്വാലിറ്റി ബ്ലോക്ക് ഉള്‍പ്പെടുന്ന ബഹുനില കെട്ടിടവും ഇതിനോട് ചേര്‍ന്ന് മറ്റൊരു പുതിയ ബഹുനില കെട്ടിടവും ആശുപത്രിക്ക് വേണ്ടി പണികഴിപ്പിച്ചിട്ടുണ്ട്. താല്‍ക്കാലികമായി ഈ കെട്ടിടങ്ങളില്‍ എവിടെങ്കിലും പ്രസവ വാര്‍ഡ് ക്രമീകരിക്കുകയും പിന്നീട് എല്ലാവിധ സൗകര്യങ്ങളോടും കൂടിയ പ്രസവവാര്‍ഡ് ആശുപത്രിയില്‍ യാഥാര്‍ത്ഥ്യമാക്കുകയും വേണമെന്നാണ് ആവശ്യം.
