മൂന്നാര്‍: മൂന്നാര്‍ ടൗണിലെ സുബ്രഹ്മണ്യസ്വാമി ക്ഷേത്രത്തിലെ മോഷണം തടയാന്‍ ശ്രമിച്ച കാവല്‍ക്കാരനെ തലക്കടിച്ച് പരിക്കേല്‍പ്പിച്ച ശേഷം രക്ഷപ്പെട്ട പ്രതിയെ പൊലീസ് തമിഴ്‌നാട്ടില്‍ നിന്നും പിടികൂടി. മേട്ടുപ്പാളയം ഒട്ടന്‍തുറൈ സ്വദേശി ഗോപാല്‍ എന്ന് വിളിക്കുന്ന പി സെല്‍വകുമാറാണ് പിടിയിലായത്. ഇക്കഴിഞ്ഞ മാര്‍ച്ച് 14 ന് രാത്രിയിലാണ് മൂന്നാര്‍ ടൗണിലെ സുബ്രഹ്മണ്യ സ്വാമി ക്ഷേത്രത്തില്‍ മോഷണം നടന്നത്.സംഭവവുമായി ബന്ധപ്പെട്ട് ക്ഷേത്രത്തിലെ കാവല്‍ക്കാരനായ നല്ലതണ്ണി കല്ലാര്‍ ഫാക്ടറി ഡിവിഷനില്‍ എം. മാടസ്വാമിയെ പ്രതി ഇരുമ്പുകമ്പി കൊണ്ട് തലക്കടിച്ച് പരിക്കേല്‍പ്പിച്ചിരുന്നു.
കിടന്നുറങ്ങുകയായിരുന്ന മറ്റൊരു കാവല്‍ക്കാരനെ പ്രതി മുറിയില്‍ പൂട്ടിയിട്ടിരുന്നു. മേട്ടുപ്പാളയം പൊലീസിന്റെ സഹകരണത്തോടെയാണ് മൂന്നാര്‍ പൊലീസ് അന്‍പത്തി രണ്ടുകാരനായ പ്രതിയെ പിടികൂടിയത്. ഇയാള്‍ നിരവധി കേസുകളിലെ പ്രതിയാണെന്നാണ് പോലീസ് നല്‍കുന്ന വിവരം. ക്ഷേത്രത്തില്‍ മോഷണം നടത്തിയ അന്നു തന്നെ ഇയാള്‍ കോളനിയിലെ ചില വീടുകളിലും അമ്പലത്തിനു സമീപമുള്ള വീടുകളിലും മോഷണം നടത്തിയിരുന്നു. എസ്എച്ച് ഒ രാജന്‍ കെ.അരമന, എസ് ഐ അജേഷ്.കെ.ജോണ്‍, എന്നിവരുടെ നേതൃത്വത്തിലുള്ള പ്രത്യേക സംഘമാണ് പ്രതിയെ പിടികൂടിയത്.
