യുവതിയെ തട്ടിക്കൊണ്ടുപോയെന്ന് ഫോൺ കോൾ; പരക്കംപാഞ്ഞത് പൊലീസുകാര്…. ഒടുവില് വന് ട്വിസ്റ്റ്
അടിമാലി : യുവതിയെ തട്ടിക്കൊണ്ടുപോയെന്ന് പോലീസിന്റെ ടോൾ ഫ്രീ നമ്പറിലേക്ക് ഒരു കോൾ. വിവരമറിഞ്ഞതും പൊലീസുകാര് പരക്കംപാഞ്ഞത് മണിക്കൂറുകളോളം. അന്വേഷണം ആരംഭിച്ചു കാർ ഉടമയെ കണ്ടെത്തിയപ്പോഴാണ് സംഭവത്തിന്റെ സത്യാവസ്ഥ അറിഞ്ഞത്.
ആനച്ചാൽ ടൗണിലാണ് സംഭവം നടന്നത്. കഴിഞ്ഞ 31-ന് ഉച്ചകഴിഞ്ഞാണ് പൊലീസിന്റെ ടോള് ഫ്രീ നമ്പറിലേക്ക് ഒരു ടാക്സി ഡ്രൈവറുടെ ഫോണ് കോളെത്തിയത്. ആനച്ചാല് ടൗണില് നിന്ന് യുവതിയെ കാറില് തട്ടിക്കൊണ്ടുപോയെന്നാണ് ഫോൺ സന്ദേശം. ഇതോടെ മൂന്നാര്, വെള്ളത്തൂവല് സ്റ്റേഷനുകളിലെ ഉദ്യോഗസ്ഥര് വിവിധയിടങ്ങളിലായി പരിശോധന തുടങ്ങി. അന്വേഷണത്തിന് ഒടുവിൽ കാറിന്റെ നമ്പര് ലഭിച്ചു. ചിത്തിരപുരം സ്വദേശിയുടേതാണ് കാറെന്ന് പൊലീസ് കണ്ടെത്തി. ഉടൻതന്നെ പൊലീസ് സംഘം ഉടമയുടെ വീട്ടിലെത്തി. അപ്പോഴാണ് സംഭവത്തിന്റെ ട്വിസ്റ്റ് പൊലീസിന് പിടികിട്ടിയത്.
സംഭവം പുറലോകം അറിഞ്ഞുതോടെ നാടാകെ വലിയ തോതിലുള്ള തെരച്ചിലാണ് പോലീസ് നടത്തിയത്. എന്നാൽ അവിടെ അവരെ കാത്തിരുന്നത് തികച്ചും അപ്രതീക്ഷിതവും എന്നാൽ ഹൃദയസ്പർശിയുമായ ഒരു വഴിത്തിരിവായിരുന്നു. ഉടമയുടെ വീട്ടിൽ പോലീസ്എത്തിയപ്പോഴാണ് ഉടമയും ഭാര്യയും നാട്ടിൽ നടന്ന കോലാഹലങ്ങളെക്കുറിച്ച് അറിയുന്നത്.
യഥാർത്ഥത്തിൽ സംഭവിച്ചത് ഇങ്ങനെ. ആനച്ചാൽ ടൗണിൽ വെച്ച് കാറിൽ നിന്നിറങ്ങുന്നതിനിടെ കാറിന്റെ ഡോറിൽ തട്ടി ഉടമയുടെ ഭാര്യ അബദ്ധത്തിൽ റോഡിലേക്ക് വീഴുകയായിരുന്നു. പെട്ടെന്നുണ്ടായ അപകടത്തിൽ ഭർത്താവ് വല്ലാതെ പരിഭ്രാന്തനായി. ഭാര്യയ്ക്ക് എന്തെങ്കിലും പറ്റിയോ എന്ന ഭയത്താൽ അദ്ദേഹം ഒട്ടും സമയം കളയാതെ അവളെ ധൃതിയിൽ കോരിയെടുത്ത് കാറിനുള്ളിലേക്ക് കിടത്തി, എത്രയും വേഗം ആശുപത്രിയിൽ എത്തിക്കാൻ വണ്ടി അതിവേഗം മുന്നോട്ട് എടുക്കുകയായിരുന്നു.
ഒരു ഭർത്താവിന് ഭാര്യ വീഴുന്നത് കണ്ട് ഉണ്ടായ പരിഭ്രാന്തി നിറഞ്ഞ ആ പ്രവൃത്തി, പുറത്തുനിന്നു കണ്ട ഒരു ടാക്സി ഡ്രൈവർക്ക് തട്ടിക്കൊണ്ടുപോകലായി തോന്നി. തെറ്റിദ്ധാരണയാണെങ്കിലും ഒരു സ്ത്രീയുടെ സുരക്ഷയ്ക്കായി ഉണർന്നുപ്രവർത്തിച്ച ടാക്സി ഡ്രൈവറുടെ നന്മയെയും, ആ സന്ദേശം ലഭിച്ചയുടൻ ഒട്ടും വൈകാതെ പരക്കം പാഞ്ഞ കേരള പോലീസിന്റെ ജാഗ്രതയെയും നിറഞ്ഞ മനസ്സോടെയാണ് ജനങ്ങൾ സ്വീകരിച്ചത്. എല്ലാ ആശങ്കകൾക്കും ഒടുവിൽ ആ കുടുംബത്തിന്റെ സന്തോഷം കണ്ട നാട്ടുകാർക്കും പോലീസിനും ഇപ്പോൾ ആശ്വാസത്തിന്റെ നിമിഷങ്ങളാണ്.
