മറയൂര്‍: ജയില്‍ വാസത്തിനിടെ സുഹൃത്തുക്കള്‍ ആയി, പിന്നീട് മറയൂരില്‍ എത്തി ചന്ദനം കടത്തിയ കുപ്രസിദ്ധ ഗുണ്ടകള്‍ പിടിയില്‍. തിരുവനന്തപുരത്തെ കുപ്രസിദ്ധ ഗുണ്ടയായ അജിത്തിനെയും മറയൂര്‍ സ്വദേശി മഹേഷിനേയും ആണ് മറയൂര്‍ പോലിസ് പിടികൂടിയത്.
മറയൂര്‍ കുടുംബാരോഗ്യ കേന്ദ്രത്തിന്റെ പരിസരത്ത് നിന്നും ചന്ദനം മോഷണം പോയതായി ചൂണ്ടികാട്ടി ബന്ധപ്പെട്ടവര്‍ കഴിഞ്ഞ 29ന് മറയൂര്‍ പോലീസില്‍ പരാതി നല്‍കിയിരുന്നു. തുടര്‍ന്ന് നടന്ന അന്വേഷണത്തില്‍ പ്രദേശവാസിയും സ്ഥിരം കുറ്റവാളിയുമായ മഹേഷ് സ്ഥലത്ത് എത്തിയിട്ടുണ്ടെന്ന് പോലീസ് മനസിലാക്കി.
പിന്നീട് ഇയാളുടെ വീട്ടില്‍ നിന്ന് ഇയാളെയും കുറ്റവാളിയും തിരുവനന്തപുരം സ്വദേശിയുമായ അജിത്തിനെയും പോലിസ് പിടികൂടുകയായിരുന്നു. ഇവര്‍ക്കൊപ്പം ഉണ്ടായിരുന്നവര്‍ ഒളിവില്‍ പോയതയാണ് സൂചന. നിരവധി കേസുകളില്‍ പ്രതികളാണ് പിടിയിലായവരെന്നാണ് വിവരം. പൂജപ്പുര സെന്‍ട്രല്‍ ജയിലില്‍ കഴിയവേ സുഹൃത്തുക്കളായ ഇരുവരും മറയൂരില്‍ നിന്ന് ചന്ദനം കടത്താന്‍ പദ്ധതി ഒരുക്കുകയായിരുന്നു. ജാമ്യത്തില്‍ പുറത്തിറങ്ങിയ ഇരുവരും മറയൂരില്‍ എത്തുകയും മഹേഷിന്റെ വീട്ടില്‍ താമസമാക്കുകയും ചെയ്തു.
തുടര്‍ന്ന് കഴിഞ്ഞ 25ന് കുടുംബാരോഗ്യ കേന്ദ്രത്തിന്റെ സമീപത്തു നിന്ന് ചന്ദനം മുറിക്കുകയും ചെത്തി ഒരുക്കിയ ചന്ദന മുട്ടികള്‍ ബിഗ് ഷോപ്പറില്‍ ആക്കി 27ന് ഓട്ടോറിക്ഷയില്‍ മൂന്നറിലേക്ക് പോവുകയും ചെയ്തു. ചട്ട മുന്നാറിലെ വനം വകുപ്പ് ചെക്ക് പോസ്റ്റില്‍ പിടിക്കാതിരിക്കാനായി, ക്ഷേത്രത്തില്‍ കാണിക്ക ഇടാന്‍ എന്ന വ്യാജേന ഓട്ടോറിക്ഷയില്‍ നിന്ന് ഇറങ്ങിയ മഹേഷ് ചെക്ക് പോസ്റ്റ് കഴിഞ്ഞ ശേഷം വീണ്ടും വാഹനത്തില്‍ കയറുകയും ചന്ദനം മൂന്നാറില്‍ എത്തിക്കുകയുമായിരുന്നു. പിന്നീട് ഇവര്‍ മറയൂരിലേക്ക് തിരികെ പോന്നു.ഒളിവില്‍ പോയ പ്രതികള്‍ക്കായി അന്വേഷണം ഊര്‍ജിതമാക്കി. അറസ്റ്റിലായ പ്രതികളെ റിമാന്‍ഡ് ചെയ്തു.
