മാങ്കുളം: കല്ലാര്‍ മാങ്കുളം റോഡില്‍ യാത്രകാര്‍ക്ക് ഭീഷണിയായി നില്‍ക്കുന്ന മരവും മര ശിഖരങ്ങളും മുറിച്ച് നീക്കാന്‍ ഇനിയും നടപടിയില്ല. പീച്ചാട് മുതലുള്ള ഭാഗത്താണ് പാതയോരത്ത് മരവും മരശിഖരങ്ങളും അപകട ഭീഷണി ഉയര്‍ത്തി നില്‍ക്കുന്നത്. വിരിപാറക്ക് സമീപം വഴിയരികില്‍ വലിയ മരം ഉണങ്ങി നില്‍ക്കാന്‍ തുടങ്ങിയിട്ട് നാളുകളേറെയായി. കൈനഗിരിക്ക് സമീപവും സമാന രീതിയില്‍ മരം ഉണങ്ങി അപകട സാധ്യത സൃഷ്ടിക്കുന്നു. ഉണങ്ങിയ മരങ്ങള്‍ക്ക് പുറമെ വേറെയും മരങ്ങള്‍ റോഡിലേക്ക് ചാഞ്ഞ് അപകടാവസ്ഥ ഉയര്‍ത്തുന്നുണ്ട്. മഴ കനക്കും മുമ്പെ ഈ മരങ്ങള്‍ മുറിച്ച് നീക്കണമെന്നാണ് ആവശ്യം.
പലപ്പോഴും മരം കടപുഴകി വീണും മരശിഖരങ്ങള്‍ ഒടിഞ്ഞ് വീണുമൊക്കെ ഉണ്ടാകുന്ന അപകടങ്ങളില്‍ നിന്നും തലനാരിഴക്കാണ് വാഹനയാത്രികര്‍ രക്ഷപ്പെടാറ്. സ്വകാര്യ ബസുകളും സ്‌കൂള്‍ ബസുകളും വിനോദ സഞ്ചാര വാഹനങ്ങളുമൊക്കെ അപകടാവസ്ഥ ഉയര്‍ത്തുന്ന മരങ്ങള്‍ക്ക് ചുവട്ടിലൂടെ കടന്ന് പോകുന്നു. ഉണങ്ങിയ മരങ്ങള്‍ മഴ നനയുക കൂടി ചെയ്യുന്നതോട കൂടുതല്‍ ദുര്‍ബലമാകും.ഇത് അപകട സാധ്യത വര്‍ധിപ്പിക്കുന്നു. മഴക്കാലങ്ങളില്‍ കല്ലാര്‍ മാങ്കുളം റോഡില്‍ മരം ഒടിഞ്ഞ് വീണ് ഗതാഗത തടസ്സവും വൈദ്യുതി തടസ്സവും ഉണ്ടാകുന്നത് പതിവാണ്. ആളുകള്‍ വഴിയില്‍ കുടുങ്ങുന്നതിനൊപ്പം വൈദ്യുതി ലൈനുകള്‍ പൊട്ടിയും വൈദ്യുതി തൂണുകള്‍ ഒടിഞ്ഞും വൈദ്യുതി വകുപ്പിനും നഷ്ടം ഉണ്ടാകാറുണ്ട്. റോഡില്‍ വാഹനങ്ങളൊ ആളുകളോ ഉള്ള സമയത്ത് മരങ്ങള്‍ നിലംപതിച്ചാല്‍ വലിയ അപകടത്തിന് ഇടവരുത്തും. അപകടം ഉണ്ടാകും മുമ്പെ മരങ്ങള്‍ മുറിച്ച് അപകട സാധ്യത ഒഴിവാക്കണമെന്നാണ് ആവശ്യം.
